Bondarava zamachnułasia na biełaruskija kancerty Kirkorava, ale jon joj akazaŭsia nie pa zubach
Prarasijskaja furyja z Hrodna Volha Bondarava, viadomaja svaimi vystupleńniami suprać prajavaŭ biełaruskaha kulturnaha žyćcia, hetym razam znajšła sabie niečakanuju patencyjnuju achviaru. Jana aburyłasia płanami Filipa Kirkorava dać dva kancerty ŭ Biełarusi i pasprabavała ich skasavać. Ale kali najezdy Bondaravaj na dziejačaŭ biełaruskaj kultury achvotna zadavalniajucca, to z Kirkoravym najšła kasa na kamień, piša Reform.by.
Filip Kirkoraŭ pavinien vystupić u Hrodnie 25 listapada i ŭ Minsku 26 listapada. Bondarava najechała na rasijskaha śpievaka tamu, što ličyć jaho dziejačam «ź nizkaj hramadzianskaj i sacyjalnaj adkaznaściu» i zajaŭlaje, što takim typam nie miesca na biełaruskaj scenie. Aktyvistka pryvodzić čatyry pryčyny skasavać vystupy Kirkorava, pakolki, na jaje dumku:
- Kirkoraŭ adnaznačna vykazaŭsia ŭ padtrymku Maksima Hałkina i inšych, jakija apraŭdvajuć «banderaŭščynu i nacyzm»;
- jon nazvaŭ cnatlivaść «ahidnaj maskaj»;
- jon rastaptaŭ raśpiaćcie dziela chajpa (muzyčny numar da pieśni «Maryja Mahdalena» na kancercie ŭ Kramloŭskim pałacy);
- jon zacałavaŭ da mazaloŭ ruki Dani Miłochina, jaki «nie vyznačyŭsia, chto jon, ci to chłopčyk, ci to dziaŭčynka».
Bondarava sabrała podpisy ŭ padtrymku admieny kancertaŭ śpievaka i źviarnułasia ŭ Minharvykankam. U zvarocie jana zapatrabavała nie tolki admianić vystupy, ale i pravieści rasśledavańnie «ŭ aburalnaj situacyi, kali čynoŭniki dajuć dazvoł na vystup artysta z adnaznačna antydziaržaŭnaj i adkryta pranacysckaj pazicyjaj, jaki prapahanduje ŁHBT i inšyja miarzoty», i pakarać vinavatych.
Adkaz Minharvykankama Bondarava raźmiaściła ŭčora ŭ svaim tielehram-kanale. U im havorycca, što Kirkoraŭ nie budzie vykonvać pieśniu «Maryja Mahdalena» ŭ Minsku, a ŭpraŭleńnie kultury Minharvykankama praviadzie manitorynh kancerta.
Taki adkaz minskich čynoŭnikaŭ rasčaravaŭ aktyvistku. Jana ličyć, što «babło i libierały pierasilili maralnyja normy» i škaduje, što ŭ Biełarusi niama tych, chto «pahonić pahanaj miatłoj maralnych vyradkaŭ preč». Pry hetym Bondarava adznačaje, što vyčarpała svaje resursy i spadziajecca, što damahčysia skasavańnia kancertu moža supolnaść musulman Biełarusi.
Toje, što, u adroźnieńnie ad biełaruskaj kultury, u vypadku z Kirkoravym Bondarava paciarpieła fijaska, tłumačycca vielmi prosta — Kirkoraŭ całkam svoj dla Łukašenki. U krasaviku hetaha hoda jon vinšavaŭ śpievaka z dniom naradžeńnia i nazvaŭ jaho daŭnim siabram Biełarusi, kožnaja sustreča ź jakoj źjaŭlajecca doŭhačakanaj padziejaj.
Čytajcie taksama:
«Nachabna handlujuć majkami z «Ŭ». Prarasijskaja aktyvistka z Hrodna pieraklučyłasia z apazicyi na danosy na čynoŭnikaŭ i biznes
U Hrodnie paśla zvarotu prarasijskaj aktyvistki zakryli mastackuju halereju «400 kvadrataŭ»
Ciapier čytajuć
Palčys, Andrejeva, Łojka i inšyja imiony — paśla vizitu amierykanskich dypłamataŭ u Minsk vyzvalili 250 palitviaźniaŭ15
Kamientary