Biełaruski Fond spartyŭnaj salidarnaści suprać dopusku biełarusaŭ i rasijan na Alimpijadu biez asudžeńnia imi vajny i represij
Biełaruski Fond spartyŭnaj salidarnaści vystupiŭ z zajavaj pa pytańni mahčymaha dopusku pradstaŭnikoŭ Rasii i Biełarusi da Alimpijskich hulniaŭ—2024 u Paryžy. Jon vykazaŭsia suprać mahčymaści ŭdzielničać u hulniach lubym spartsmienam, ale ličyć, što heta mahčyma ŭ piersanalnym paradku pry vykanańni imi peŭnych umoŭ.
Fond u svajoj zajavie źviartaje ŭvahu, što režymy Rasii i Biełarusi raźviazali vajnu suprać Ukrainy, a taksama padviarhajuć maštabnym represijam svaich ułasnych hramadzian. Pry hetym siarod palityčnych viaźniaŭ u Biełarusi bolš za 30 spartoŭcaŭ, a sotni biełaruskich spartoŭcaŭ i trenieraŭ byli zmušanyja pakinuć krainu, dziasiatki ž stracili mahčymaść vystupać na Alimpijskich hulniach z-za svajoj hramadzianskaj pazicyi.
Hetyja dziejańni, pavodle arhanizacyi, nie adpaviadajuć pryncypam, zakładzienym u Alimpijskaj chartyi, a taksama źjaŭlajucca parušeńniem bazavych pravoŭ čałavieka. U hetych umovach udzieł spartoŭcaŭ ź Biełarusi i Rasii ŭ najbujniejšych mižnarodnych spartyŭnych mierapryjemstvach, u tym liku Alimpijadach i Paralimpijadach, niedapuščalny, pakolki budzie vykarystany jak srodak prapahandy.
U toj ža čas Fond ličyć, što da Alimpijady mohuć być dapuščanyja atlety ź biełaruskim ci rasijskim hramadzianstvam, jakija ŭ poŭnaj miery prytrymlivajucca pryncypaŭ Alimpijskaj chartyi. Ale jany musiać vykanać nastupnyja bazavyja ŭmovy:
- Niejtralny status — adsutnaść himnaŭ, ściahoŭ i inšych elemientaŭ dziaržaŭnaj simvoliki;
- Publičnaje asudžeńnie dziejańniaŭ rasijskaha i biełaruskaha režymaŭ u dačynieńni da raźviazanaj ahresiŭnaj vajny i ŭnutranych represij pa palityčnym pryncypie, dałučeńnie da Antyvajennaj dekłaracyi spartoŭcaŭ;
- Adsutnaść padtrymki z boku dziaržavy, u tym liku ciesna źviazanych ź joj jurydyčnych i fizičnych asob;
- Niadopusk aficyjnych pradstaŭnikoŭ, spartyŭnych funkcyjanieraŭ, a taksama pradstaŭnikoŭ prapahandy dźviuch krain na mierapryjemstva.
Učora stała viadoma, što Alimpijski i Paralimpijski kamitet ZŠA (USOPC) padtrymlivaje ideju dapuścić rasijskich i biełaruskich spartsmienaŭ da ŭdziełu ŭ Alimpijadzie 2024 hoda ŭ Paryžy, kali jany nie buduć vystupać pad nacyjanalnymi ściahami svaich krain.
Čytajcie taksama:
ZŠA padtrymali ŭdzieł rasijskich i biełaruskich spartsmienaŭ u Alimpijadzie 2024 hoda
Ciapier čytajuć
Kamientary