U Minsku adbudziecca maštabny schod ludziej ź imiem Andrej

U Minsku projdzie mierapryjemstva, udzielnikam jakoha ŭvohule nie treba pradstaŭlacca adzin adnamu. Havorka pra ivent supolnaści «1000 Andrejaŭ», heta litaralna sustreča, meta jakoj — sabrać u adnym pamiaškańni jak maha bolš ludziej ź imiem Andrej, piša Onliner.by.

Kamjunici Andrejaŭ prydumaŭ rasijanin Andrej Martynaŭ. Usio pačałosia z žartaŭlivaha ryłsa, u jakim małady čałaviek paklikaŭ ciozak sabracca razam u karaokie i śpieć tuju samuju pieśniu «Pryvitańnie, Andrej». Žart davoli chutka razrośsia da niejkich niejmaviernych maštabaŭ. Zasnavalnik supolnaści raspavioŭ, što ŭ červieni na pieršuju sustreču Andrejaŭ u Sankt-Pieciarburhu pryjšli 600 čałaviek.

— Instagram ja nikoli nie vioŭ, błohieram nie byŭ, u vyniku vykłaŭ adzin ryłs — i pračnuŭsia papularnym. Mnie pisali z Uładzivastoka, ź Irkucka, z Kazachstana — Andrei skidvali bilety i kazali, što ŭžo laciać. A ŭ mianie nie było ni placoŭki, ni prahramy, ni biudžetu. Try dni nie jeŭ, nie spaŭ. Ale zrazumieŭ, što šlachu nazad niama, treba iści da kanca. I voś što atrymałasia.

Pavialičyć

Adnoj tolki picierskaj sustrečaj Andrei nie abmiežavalisia: praz dva miesiacy taki ž ivent praviali ŭ Maskvie. U telehram-čacie «1000 Andrejaŭ» kolkaść udzielnikaŭ nasamreč užo pieravaliła za 3000, a ŭ Instagram na Martynava padpisalisia kala 8000 ciozak.

Adzin z udzielnikaŭ stvaryŭ sajt z «bazaj Andrejaŭ» — tudy pa zajaŭcy mohuć trapić Andrei, jakija hatovyja padzialicca svaim prafiesijnym dośviedam abo prapanavać inšym Andrejam jakija-niebudź pasłuhi. U kamjunici ŭžo składajucca, zdajecca, mužčyny ŭsich prafiesij: pradprymalniki, navukoŭcy, bankiry, inžyniery, kiroŭcy.

— Aŭdytoryja ŭ nas dastatkova darosłaja — ad 25 da 60 hadoŭ. My stvaryli svoj łahatyp i ściah ź im. Adzin Andrej padniaŭ jaho na Elbrus, druhi — na Ararat. Jašče adnamu Andreju sabrali hrošaj na apieracyju na kalenny sustaŭ.

Uvohule, u nas jość meta być karysnymi, rabić niejkija dobryja spravy. Naprykład, jość ideja Andrejam skinucca na sadžancy dreŭ, a zatym, damoviŭšysia z administracyjaj jakoha-niebudź horada, vysadzić dubovuju aleju i nazvać jaje Andrejeŭskaj. Pačałosia ŭsio z žartu, ale paśla pieršych sustreč ja zrazumieŭ, što patencyjał vielizarny.

Pavialičyć

Pieršaja sustreča Andrejaŭ u Minsku projdzie 31 kastryčnika.

Miesca abvieściać paźniej, bližej da hetaj daty. Ivent zakryty, trapić na jaho možna pa papiaredniaj rehistracyi i nastupnym zaprašeńni — zrazumieła, tolki Andrejam. Rehistracyja adkryłasia tolki ŭčora, ale ŭžo pastupiła 63 zajaŭki.

— Heta budzie karaokie-viečar. Andrei buduć znajomicca i śpiavać pieśni, — koratka anansavaŭ minskuju sustreču Andrej Martynaŭ, dadaŭšy, što kamanda taksama pracuje nad pryciahnieńniem viadomych ciozak. U Rasii supolnaść užo padtrymali Andrej Hryhorjeŭ-Apałonaŭ z «Ivanušak» i biźniesmien Andrej Kavaloŭ.

• 1
• 0
• 0
• 5
• 0
• 0
• 0
• 1