Užo dva tydni ŭ Batumi ŭ testavym režymie pracuje krama biełaruskaj simvoliki Batumiby.ge. Pra ideju stvareńnia, asartymient i pakupnikoŭ z uładalnikam kramy Andrejem Mialeškam parazmaŭlała Budzma.org.
Ad cišotak da paštovak časoŭ BNR
Andrej Mialeška raskazvaje, što ideja adkryćcia čahości padobnaha isnavała jašče z 2021 hoda, ale realizavać jaje atrymałasia tolki zaraz.
Paśla likvidacyi hrodzienskaj kramy biełaruskich koleraŭ «Admietnaść» u Batumi atrymałasia pieravieźci šmat roznaha tavaru. Uładalnik kramy zajmajecca kalekcyjanavańniem daŭniny, tamu vyrašyŭ u Hruzii realizoŭvać niekatoryja elemienty svajoj kalekcyi:
«U 2020 hodzie ŭdałosia znajści ŭ Harodni kukardy z «Pahoniaj», jakija nasili milicyjanty ŭ Biełarusi jašče ŭ 90-ja hady XX stahodździa. U nas taksama jość u kramcy takija rarytety, jak aryhinalnyja marki Asobnaha Atrada BNR z pačatku 20-ch hadoŭ XX stahodździa z majoj asabistaj kalekcyi», — raspaviadaje Andrej.
Akramia biełaruskaj simvoliki, u kramie jość taksama ŭkrainskaja i hruzinskaja.
Aŭtarski asartymient, jaki biełaruskija majstry robiać u Batumi
Asnoŭny asartymient — nacyjanalnyja ściahi i znački, taksama karystajucca popytam kubki i cišotki, jakija Andrej robić u supracy z kramaj «Admietnaść», što pierabazavałasia ŭ Biełastok. Taksama na palicach kramy možna znajści vyraby sa škła i dreva, humovyja branzalety ź simvolikaj na luby hust.
Naładzili ščylnuju supracu i ź biełaruskimi ramieśnikami:
«Na miescy ŭ Batumi my majem niekalki biełaruskich majstroŭ, jakija viažuć šaliki, škarpetki z nacyjanalnaj simvolikaj. Adna biełaruska prynosić da nas u kramku šakaład ručnoj raboty ŭ vyhladzie aniołkaŭ i sercajkaŭ. A ad ukrainskich majstroŭ majem niekalki aŭtarskich cišotak i šopieraŭ, pierniki i broški. Naša siamja robić taksama lalki i maski dla snu, jakija taksama nabyvajuć biełarusy», — dzielicca ŭładalnik kramy.
Na hety momant asartymient aŭtarskich rabot składaje kala 25—30%, «ale, dumaju, ź ciaham času jon budzie pavialičvacca. Bo paśla pieršych abjaŭ u sacyjalnych sietkach pačali prychodzić pieršyja majstry, jakim cikava pradavać svaju pradukcyju», — dadaje Andrej.
Partret siaredniaha pakupnika simvoliki
Zhodna z nazirańniami ŭładalnika kramy, siaredniestatystyčny pakupnik — heta małady biełarus ci biełaruska ŭzrostam kala 30—40 hod, jakija pryjechali ŭ Hruziju ŭ 2021—2023 hadach. «Čałaviek ź siarednim dastatkam, jaki moža nabyć za adzin raz niešta na sumu ad 15 da 20 dalaraŭ. Taksama siarod pakupnikoŭ u našaj kramcy ciapier vialikaja kolkaść ukraincaŭ i ŭžo pačynajuć zachodzić i hruziny, jakija nabyvajuć znački jak z ukrainskaj, tak i ź biełaruskaj simvolikaj», — reziumuje biznesoviec.
Krama biełaruskaj simvoliki znachodzicca ŭ Batumi pa adrasie: vulica 26 Maja, 41. Za navinkami kramy možna sačyć i ŭ instahramie.
Ciapier čytajuć
Ihar Tur patraciŭ minimum 30 tysiač na premijalnuju kuchniu FOTA29
Ihar Tur patraciŭ minimum 30 tysiač na premijalnuju kuchniu FOTA
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»33
Kamientary