Brakańjery prydumali chitruju schiemu vyłavu ryby na prodaž u čarnobylskaj zonie
Žychar Homiela, jaki nidzie aficyjna nie pracuje, arhanizavaŭ hrupu z padletkaŭ, jakaja zajmałasia niezakonnaj łoŭlaj ryby ŭ zonie, zabrudžanaj radyjacyjaj, dzie dziejničaje kantrolna-prapuskny režym, paviedamiła Dziaržaŭnaja inśpiekcyja pa achovie pryrody i navakolnaha asiarodździa.
Arhanizatar raspracavaŭ płan, raźmierkavaŭ roli pamiž udzielnikami i pradumaŭ sposab prykryćcia. Pad vyhladam zvyčajnych adpačyvalnikaŭ jany raźbili łahier z pałatkami ŭ nibyta čystaj zonie i navat uklučali muzyku, kab nie vyklikać padazreńniaŭ.
Dniom udzielniki hrupy adpačyvali na bierazie raki i sačyli za situacyjaj navokał. Uviečary ž jany na dvuch nadzimanych łodkach pierapraŭlalisia na supraćlehły bierah — u zonu adčužeńnia.
Tam, na pojmiennym vadajomie, jany stavili rybałoŭnyja sietki ahulnaj praciahłaściu bolš za 650 mietraŭ.
U vyniku było nałoŭlena bolš za 100 kiłahramaŭ roznaj ryby. Płanavałasia, što paśla jaje buduć pradavać. Pry hetym arhanizatar dobra viedaŭ, što terytoryja, dzie viałasia zdabyča, zabrudžanaja radyjacyjaj.
Padčas zatrymańnia hrupy mužčyna, jaki arhanizavaŭ schiemu, uciok, pakinuŭšy svaich niepaŭnaletnich saŭdzielnikaŭ. Adnak jaho asobu ŭdałosia chutka ŭstanavić, paśla čaho parušalnika zatrymali.
Škodu, naniesienuju navakolnamu asiarodździu, acanili ŭ 1236 bazavych vieličyń. Svoječasovaje vyjaŭleńnie brakańjerstva dazvoliła nie dapuścić traplańnia zaražanaj radyjacyjaj ryby na rynak i da spažyŭcoŭ.
U dačynieńni da arhanizatara Vietkaŭski rajonny adździeł Śledčaha kamiteta raspačaŭ kryminalnuju spravu pavodle častki 4 artykuła 281 Kryminalnaha kodeksa Biełarusi. Taksama vyrašajecca pytańnie ab pryciahnieńni jaho da adkaznaści za ŭciahvańnie niepaŭnaletnich u ździajśnieńnie złačynstva.
Kamientary