MZS Rasii dało niečakanaje tłumačeńnie vybuchu ŭ maskoŭskim elitnym restaranie
Pavodle niezaležnych miedyja, metaj ataki byŭ hałoŭnakamandujučy Pavietrana-kaśmičnymi siłami RF hienierał Alaksandr Čajko, jakoha vinavaciać u vajennych złačynstvach, ale ŭ rasijskich dypłamataŭ inšaja viersija.
MZS RF upieršyniu dało aficyjny kamientaryj adnosna vybuchu ŭ maskoŭskim restaranie Balzi Rossi, u vyniku jakoha 5 čałaviek zahinuli i 19 atrymali ranieńni.
Pavodle zajavy pasolstva RF u Italii, metaj «kijeŭskich terarystaŭ» była sproba zapužać italjancaŭ, jakija pracujuć u Rasii.
«Zrazumieła, što, płanujučy terakt u adnym z najlepšych italjanskich restaranaŭ Maskvy, kijeŭskija terarysty chacieli napałochać italjancaŭ, jakija pracujuć u Rasii, pakazać im, što jany taksama pad prycełam i mohuć u luby momant stać nastupnaj achviaraj padluh», — piša pasolstva Rasii ŭ Italii.
Rasijskija dypłamaty zajaŭlajuć, što «tolki dziakujučy pilnaści i samaaddanaj viernaści svajmu prafiesijnamu abaviazku supracoŭnika rasijskaj słužby biaśpieki nie paciarpieli šef-kuchar ź Nieapala K. Alfjery i členy jaho kamandy».
Taksama jany dajuć aficyjnyja ličby: «Na žal, nie abyšłosia biez achviar. Zahinuli piać čałaviek, surjoznyja kalectvy atrymali 19 naviedvalnikaŭ restarana».
«Ciapier stała ŭžo kančatkova jasna, što vybuch u restaranie Balzi Rossi i inšyja terakty ŭ Rasii, u Manaka, u inšych miescach — heta śviedčańnie taho, što ŭkrainskaja terarystyčnaja zaraza ŭžo pačynaje raspaŭsiudžvacca pa Jeŭropie i pa Italii ŭ pryvatnaści», — reziumujuć pradstaŭniki rasijskaha źniešniepalityčnaha viedamstva.
U hety ž čas niezaležnyja žurnalisty i Z-błohiery pakazvajuć na zusim inšuju metu ataki.
U začynienym 1 žniŭnia na pryvatnaje absłuhoŭvańnie restaranie adznačałasia 55-hodździe. Hałoŭnym kandydatam u jubilary nazyvajuć hałoŭnakamandujučaha PKS RF hienierała Alaksandra Čajko, jakomu 27 lipienia spoŭniłasia 55 hadoŭ.
Sam Čajko, pa najaŭnaj infarmacyi, nie paciarpieŭ. Ale paciarpieli, padobna, jaho dačka i ziać.
Hienierał Alaksandr Čajko ŭ 2022 hodzie kamandavaŭ nastupam na Kijeŭ i znachodzicca pad sankcyjami ES praz datyčnać da vajennych złačynstvaŭ u Bučy.
Kamientary
Marny spadzieŭ, kaniešnie. Užo byŭ prykład z čačenskimi "terarystami", jakija taksama źjavilisia z "niadkul". Toj urok nie vyvučany.