Najlepšy adkaz na pravakacyju Rasii ź bieśpiłotnikam — adpraŭka Ukrainie rakiet i dronaŭ dalokaha radyusa dziejańnia — WSJ
Hazieta Wall Street Journal apublikavała redakcyjny artykuł z zaklikam da Administracyi prezidenta Džo Bajdena adkazać na niadaŭni incydent z amierykanskim bieśpiłotnikam MQ-9 Reaper adpraŭkaj Ukrainie rakiet dalokaha radyusa dziejańnia.
Tłumačačy takuju pazicyju, vydańnie adznačaje, što rašeńnie rasijskich vajskoŭcaŭ atakavać amierykanski dron u niejtralnaj pavietranaj prastory śviedčyć pra namier Kramla iści dalej u svaich ahresiŭnych dziejańniach.
Bieśpiłotnik MQ-9 Reaper raźbiŭsia ŭ Čornym mory niepadalok ad Kryma paśla taho, jak jaho pierachapiŭ rasijski źniščalnik. Ułady ZŠA kažuć, što samalot VPS Rasii skidaŭ na amierykanski aparat paliva, a zatym sutyknuŭsia ź jaho prapieleram. Ministerstva abarony Rasii śćviardžaje, što sutyknieńnia nie było i aparat upaŭ sam pa sabie.
«Niekatoryja papiaredžvajuć, što hety epizod nahadvaje pra ryzyku vajny pamiž ZŠA i Rasijaj, i tamu treba admovicca ad padtrymki Ukrainy. Ale dron dziejničaŭ u mižnarodnaj pavietranaj prastory, a Pucin choča zrabić Čornaje mora svajoj pryvatnaj vodnaj prastoraj,— piša Wall Street Journal. — Rasija moža pajści na eskałacyju, ale hetaja situacyja paćviardžaje, što Pucin — ahresar i što jahonyja ambicyi nie abmiažoŭvajucca Ukrainaj».
Na dumku žurnalistaŭ vydańnia, ciapier u Bajdena jość bolš pryčyn pajści na dziejańni, jakija «jon pavinien byŭ raspačać užo vielmi daŭno: dać Ukrainie zbroju dla pieramohi». Da jaje Wall Street Journal adnosić taktyčnyja rakiety, jakija dazvalajuć nanosić udary ŭ hłybokim tyle rasijskich pazicyj, a taksama sami drony MQ-9 Reaper.
Aŭtary redakcyjnaha artykuła śćviardžajuć, što adnoj z pryčyn admovy Vašynhtona dać Ukrainie takija aparaty byli aściarohi, što jany trapiać u ruki da rasijan, jakija vykraduć technałohii. Ale ciapier rasijskija vajskoŭcy sprabujuć vyłavić abłomki drona z Čornaha mora, a ŭ Pientahonie kažuć, što ničoha kaštoŭnaha ŭ im užo nie zastałosia paśla mier, pryniatych ZŠA.
«Heta pakazvaje, što ryzyka, źviazanaja ź pieradačaj MQ-9 Ukrainie, jość, ale jaje pieravažvajuć pieravahi płatformy, jakaja bolš za dzień moža zastavacca ŭ pavietry i pravodzić raźviedku na vialikich adlehłaściach», — skazana ŭ artykule.
Aŭtary artykuła praciahvajuć: «Administracyja Bajdena budavała palityku ŭ dačynieńni da Ukrainy z ulikam ułasnaj bojazi ŭ dačynieńni da taho, jak adreahuje [prezident Rasii], ale krušeńnie drona — apošni dokaz, što Pucin hatovy iści na lubuju ryzyku, jakaja, jak jon ličyć, moža syści jamu z ruk».
«Bajden moža pakinuć heta biez nastupstvaŭ i zadavolicca ŭłasnaj strymanaściu. Ale jamu nie spadabajucca rašeńni, jakija daviadziecca prymać u vypadku, kali Rasija pojdzie na eskałacyju i sabje samalot, kiravany amierykanskimi vajskovymi piłotami», — zaklučaje vydańnie.
Litva znoŭ začyniła miažu ź Biełaruśsiu — iznoŭ šary z kantrabandaj9
Kamientary