«Jon ciapier sustrakajecca z Boham». U Miłanie raźvitalisia ź Silvia Bierłuskoni
U miłanskim sabory ŭ sieradu adbyłasia cyrymonija raźvitańnia z byłym premjer-ministram Italii i lidaram partyi «Napierad, Italija!» Silvia Bierłuskoni. U krainie raniej abviaścili dzień nacyjanalnaj žałoby.
Abkładzienuju ružami trunu Bierłuskoni padniali z katafałka i ŭnieśli ŭ Miłanski sabor dla paminalnaj imšy pad apładysmienty tysiač ludziej, jakija sabralisia, kab raźvitacca z eks-premjeram, jak piša «Jeŭrapiejskaja praŭda».
U svaim vystupie arcybiskup Miłana Marya Delpini padkreśliŭ nieadnaznačnaść fihury Bierłuskoni, adznačyŭšy, što jon byŭ biznesoŭcam, jaki mieŭ pośpiechi i niaŭdačy, palitykam, jaki pieramahaŭ i prajhravaŭ, i asobaj, jakaja imknułasia da słavy i mieła prychilnikaŭ i niadobrazyčliŭcaŭ.
«Ale ŭ hety momant raźvitańnia i malitvy, što my možam skazać pra Silvia Bierłuskoni? Jon byŭ čałaviekam: imknieńnie da žyćcia, imknieńnie da lubovi, imknieńnie da radaści. Jon — čałaviek, i ciapier jon sustrakajecca z Boham», — dadaŭ jon.
Na raźvitańni ź Bierłuskoni pryjšli pieršyja italjanskija dziejačy, u pryvatnaści premjer-ministr Džordža Miełoni i prezident Sierdža Matareła, a taksama eks-premjery Matea Rency, Paoła Dženciłoni i Marya Drahi.
Siarod zamiežnych haściej prysutničali premjer Vienhryi Viktar Orban i emir Katara šejch Tamim bin Chamad Al Tani.
Silvia Bierłuskoni pamior u paniadziełak na 87-m hodzie žyćcia. Pierad śmierciu jon trapiŭ u balnicu.
Pavodle miedyja, u Bierłuskoni dyjahnastavali chraničny mijełamonacytarny lejkoz — redki typ raku kryvi, jaki charakterny dla pažyłych pacyjentaŭ.
Ciapier čytajuć
Statkievič raskazaŭ, jak vyžyvaŭ u źniavoleńni. I čym zajmajecca ciapier1
Kamientary