U rasparadžeńni «Biełpoła» apynułasia mietadyčka «Kryzisnyja situacyi ŭ infarmacyjnaj prastory Minskaj vobłaści», jakaja była padrychtavana miedyjachołdynham «Minskaja praŭda».
U joj raskazvajecca ab sposabach zmahańnia ź niepažadanaj infarmacyjaj. Hetuju rabotu kaardynuje Upraŭleńnie pa rabocie z rehijanalnymi ŚMI miedyjachołdynha.
Ź im pracujuć usie tvorčyja padraździaleńni chołdynha, a taksama ŭłasnyja karespandenty «Minskaj praŭdy», jakija jość u kožnym rajonie vobłaści i źviazanyja ź miascovymi ideołahami. Akramia ich pa zamovie Upraŭleńnia pracujuć błohiery, jakija robiać vyhlad, što nie źviazany ź dziaržaŭnaj hazietaj.
Dla stvareńnia masavych kamientaroŭ vykarystoŭvajecca ŭłasnaja botafierma, jakaja schavanaja pad šyldaj techničnaha adździeła chołdynhu.
Jak adznačana ŭ mietadyčcy, šmat jakija čaty i kanały ŭ sacyjalnych sietkach naležać redakcyi «Minskaj praŭdy» i vykarystoŭvajucca ŭ ideałahičnych metach.
Akramia hetaha isnuje šerah sajtaŭ i kanałaŭ, jakija publična nie źviazanyja z chołdynham i pracujuć nibyta sami na siabie. Prapahandysty spadziajucca, što takim čynam «mohuć uździejničać na nie vielmi łajalnaje da ŭłady nasielnictva».
U mietadyčcy pryvodzicca karotki ałharytm reahavańnia na niazručnuju infarmacyju. Takaja dziejnaść razhladajecca jak «infarmacyjnaja apieracyja» prapahandystaŭ. Dla jaje kaardynacyi vykarystoŭvajecca zakryty čat.
Paśla analizu infarmacyi vypracoŭvajucca varyjanty reakcyi. Heta moža być ci «ŭdar na apiaredžańnie», ci «pierachop infarmacyjnaha paradku dnia».
U pieršym vypadku hałoŭnaje — pieraklučyć uvahu ludziej na inšuju rezanansnuju padzieju. U vypadku, kali «ataka ŭžo pačałasia», u ŚMI i sacyjalnych sietkach nieadkładna publikujecca infarmacyja, jakaja adlustroŭvaje aficyjnuju pazicyju ŭłady pa hetym pytańni. Akramia hetaha stavicca zadača «rehularnaha dynamičnaha nasyčeńnia infarmacyjnaj prastory suchimi faktami, ličbami».
Adpaviedna mietadyčcy, raspaŭsiudžańnie infarmacyi pavinna adbyvacca nie tolki praz aficyjnyja kanały infarmacyi, ale i praz čaty.
Da hetaha padklučajuć błohieraŭ. Im stavicca zadača stvaryć «virusny» videakantent, «asnovaj jakoha mohuć stać emocyi i hnieŭ padmanutych fejkam ludziej» ci kamientary błohieraŭ.
Da raboty z kamientarami taksama dałučajucca supracoŭniki techničnaha adździeła chołdynhu. Asnoŭnaja zadača — publikacyja ŭ nieaficyjnych krynicach infarmacyi (telehram-kanałach, jakija nie źviazanyja z abłvykankamam i «Minskaj praŭdaj») pastoŭ, jakija źniavažliva adklikajucca ab pracy demakratyčnych ŚMI. Pry nieabchodnaści «vykarystoŭvajecca razmoŭnaja žarhonnaja leksika».
Kali infarmacyjny paradak dnia pierachopleny, to nastupnym krokam stanovicca «ŭkaranieńnie ŭ masavuju śviadomaść hramadzian ułasnaha infarmacyjnaha paradku, jaki zadaje ŭ tym liku i ŭłasnyja praviły infarmacyjnaj hulni».
Pry rajonkach masava źjaŭlajucca škoły błohieraŭ — pahladzieli, jaki kantent jany pradukujuć
Botaŭ adpravili adbielvać Vasileŭskuju, stała viadomaja mietadyčka
«A chto jon taki?» — reakcyja botaŭ na naviny pra śmierć Navalnaha
Śviet na vałasku! U botaŭ novaja mietadyčka — chvalić aŭtamatčykaŭ u Minsku i Łukašenku
Kamientary