Biełaruski dobraachvotnik Janki raskazaŭ, jak udzielničaŭ u abaronie Aŭdziejeŭki i Vaŭčanska
A taksama pra toje, jak rasiejcy źmianili svaju taktyku.
Biełaruski dobraachvotnik Ihar Jankoŭ (viadomy pad pazyŭnym Janki) amal z samaha pačatku vajny vajuje ŭ śpiecatradzie «Parahon» Hałoŭnaha ŭpraŭleńnia raźviedki Minabarony Ukrainy. U 2024 hodzie jon braŭ udzieł u apieracyjach pa abaronie Aŭdziejeŭki i Vaŭčanska. Pra ich dobraachvotnik raskazaŭ «Ukrainskaj praŭdzie».
Pra Aŭdziejeŭku Janki zhadvaje, što tam tak chutka źmianiałasia situacyja, što zadača, pastaŭlenaja ranicaj, užo była nieaktualnaja ŭ abied. Kali ich atrad pryjechaŭ, im dali zadaču ŭtrymać «darohu žyćcia» i dać ukrainskim vojskam vyjści z Aŭdziejeŭki.
Voś jak vyhladała taktyka rasiejcaŭ u tych bajach:
«Jany pačali vykarystoŭvać paŭtaratonnyja KABy [kiravanyja avijabomby] i šturmavać vialikaj kolkaściu piachoty. I kolkaść piachoty mahła prosta ŭsich ździvić. Heta, viedajecie, jak u kampjutarnych hulniach, kali arda nastupaje. Im niavažna była taktyka — jany prosta pierli».
Pra ŭdzieł u abaronie Vaŭčanska biełaruski vajar raskazaŭ nastupnaje:
«U našaha padraździaleńnia pieršapačatkova była zadača zaminiravać peŭnyja ŭčastki miascovaści. A paśla pry nastupie RF my trymali abaronu na roznych učastkach. Krajniaja z takich vialikich apieracyj, jakija byli, — my ŭtrymlivali centr Vaŭčanska, vielizarny šmatpaviarchovik. Na kožnym santymietry Vaŭčanska nam davodziłasia źniščać voraha, za kožny santymietr my tam zmahalisia».
Jak rasiejcam udałosia tam prarvacca? Janki raskazvaje, što ŭ bajach za Vaŭčansk rasiejcy źmianili taktyku i stali dziejničać bolš chitra. Kali na aŭdziejeŭskim kirunku byli čysta «miasnyja šturmy», to tut jany pačali rychtavać miascovaść pierad zachodam piachoty.
«Asnoŭny dzień u ich byŭ — heta była vialikaja kolkaść BPŁA ŭ pavietry. I što ja zaŭvažyŭ: kali ŭ Aŭdziejeŭcy jany kidali KABy paŭtaratonnyja, to ciapier ich taktyka źmianiłasia na toje, što latajuć drony, kidajecca KAB paŭtaratonny, i paśla drobnyja KABy zaściłajuć pavierchniu. Paśla zachodzić niejkaja kolkaść piachoty. I voś taki napłyŭ dzień za dniom».
Jon miarkuje, što rasiejcy zmahli chutka prarvacca, bo ŭkraincam doŭha nie davali bić amierykanskaj zbrojaj pa skapleńniach rasijskich vojskaŭ za miažoj.
«Pakolki jany pracavali z «Łancetami», KABami i drobnymi KABami, to jaki b ty ni byŭ prafiesijanał, jakuju abaronu b ty ni trymaŭ, tam nie dapamoža nijaki blindaž ad KABa», — dadaŭ vajar.
Janki kaža, što ŭkrainskaj armii ciapier najbolš patrebny FPV-drony, stancyi radyjaelektronnaja baraćby, drony dalokaha dziejańnia, artyleryjskija ŭstanoŭki, artyleryjskija snarady.
Na pytańnie, čaho najbolš bajacca rasijskija sałdaty, jon adkazaŭ napaŭžartam:
«Pucina i ipateki».
Pa trubach. Źjavilisia nieviadomyja padrabiaznaści zachopu rasijanami Aŭdziejeŭki
34-hadovy nieanacyst ź dziasiatkam sudzimaściaŭ — stała viadoma pra biełarusa, jaki zahinuŭ padčas miasnych šturmaŭ Aŭdziejeŭki
Rasijski bajec pra šturm Vaŭčanska: «Zastałosia 12 čałaviek sa 100. Nas kryšać: pakłali kulamiotam i dabili dronami»
Ukrainskija fatohrafy pakazali FOTY razburanaha Vaŭčanska, jaki sprabuje zachapić rasijskaje vojska
Kamientary