Da najbujniejšaj sietki aŭtachausaŭ Butikavto pryjšoŭ DFR. Ułaśnik zatrymany
Kampanii ź Iŭja ŭsiaho try hady, a jana ŭžo stała sapraŭdnym schavanym čempijonam biełaruskaha rynku z hrašovym patokam pad 300 miljonaŭ rubloŭ i pačała aktyŭna pazyčać na rynku. Što budzie dalej, pakul nie jasna.
Jak stała viadoma «Našaj Nivie», u pačatku tydnia supracoŭniki Departamienta finansavych rasśledavańniaŭ Dziaržkantrolu praviali pieratrusy i aryšty ŭ ofisach kampanii «Bucik Aŭta» (TAA Bucik-Inviest) pa ŭsioj krainie.
Pa našaj infarmacyi, zatrymana kiraŭnictva, u tym liku — małady haspadar biznesu, 37‑hadovy Ivan Labiejka, jakomu naležyć 100% akcyj. U jahonym telehram-akaŭncie staić aŭtamatyčny status «byŭ na hetym tydni», jaki aznačaje, što čałaviek užo niekalki dzion nie zachodziŭ u anłajn.
Dakładny sens pretenzij pakul što nieviadomy, ale kułuarna abmiarkoŭvajecca «abychod padatkaŭ».
Butikavto — vialiki i papularny aŭtachaus, choć i małady.
TAA «Bucik-Inviest» zarehistravanaje ŭ Iŭi ŭ 2023 hodzie miascovym žycharom Ivanam Labiejkam.
Pieršy aŭtachaus adkryŭsia ŭ Lidzie ŭ krasaviku 2023 hoda, a ciapier na kampaniju zapisanyja 25 abjektaŭ u 18 haradach.
U červieni 2026 hoda sietka atrymała dva dypłomy Knihi rekordaŭ Biełarusi: jak najbujniejšaja sietka aŭtachausaŭ krainy i jak sietka z adnym z samych chutkich prodažaŭ mašyn z prabieham.
Kampanija vielmi chutka vyrasła, u 2025 praź ich rachunki prajšło 287 miljonaŭ rubloŭ, a prybytak tolki za pieršaje paŭhodździe 2026‑ha — 6,6 miljona rubloŭ. U kampanii pracuje bolš za sotniu čałaviek.
U čym mahija? «BucikAŭto» heta nie tolki aŭtachaus, a sutnasna jašče i finansavy brokier. Takaja kambinacyja stała mahčymaj tolki ŭ peŭny momant času, kali dastatkova raźvilisia pieradumovy.
Viadoma, što ŭ Biełarusi drakonaŭskija myty pry ŭvozie patrymanaj mašyny z-za miažy, ad jakich vyzvalenyja tolki niekatoryja katehoryi hramadzian: invalidy i šmatdzietnyja.
Tyja mohuć pieryjadyčna zavozić u krainu mašyny ź ilhotaj. I što ŭ vyniku atrymlivajecca? Vyras kłas ludziej, jakija šukajuć «ilhotnikaŭ» i ad ich imia, pa davieranaści, kuplajuć za miažoj mašyny. Ilhotnik atrymlivaje za heta premiju, i na hetym jaho ŭdzieł zakančvajecca.
A ŭ samich novych pierakupščykaŭ sens raboty nie ŭ padbory mašyny jak takoj, a ŭ mastactvie znachodzić i ŭhavorvać ilhotnikaŭ.
Hetym zajmajecca šmat ludziej u krainie, bo takaja ščylina dazvalaje padzarabić. U vyniku kolkaść pierakupaŭ i inicyjatyva źmianili samu schiemu, pa jakoj pracujuć aŭtachausy — bo dalej finansavać zakupki samomu, kali ŭ krainie vyhadavałasia armija pierakupaŭ na plačach ilhotnikaŭ, nierentabielna.
Stali rabić inačaj, vyrašajučy prablemy pierakupščykaŭ, jakim treba pradać zaviezieny tavar. Jakija jość varyjanty?
Pieršy: pradać mašynu samomu. Ale tady ŭ kupca pavinny być adrazu hrošy na jaje, a ŭ nas nie taki partret spažyŭca. Kali ŭ čałavieka adrazu jość hrošy, to jon i kupić z sałona.
Tady druhi varyjant — pradać u kredyt. Ale jak? I voś tut znajšłasia niša dla aŭtachausaŭ novaha typu, jakija pa sutnaści prosta zvodziać pryvatnych pierakupaŭ z klijentam, a klijenta z bankam u adnym miescy.
Klijent — časta zusim biez hrošaj — prychodzić u aŭtachaus i vybiraje mašynu, jakaja naležyć pryvatnaj asobie, ale jakuju realizujecca aŭtachausam.
U vyniku ŭ schiemie zarablajuć usie:
— pierakupščyk — kredytnaje plačo dazvalaje jamu pradać mašynu chutčej i daražej;
— aŭtachaus — jon biare kamisiju ź pierakupščyka za placoŭku i z banka ci lizinhavaj za klijenta;
— bank — na pracentach.
Dla kupca heta mahčymaść kupić mašynu ŭ kredyt. Pierakupy sami navypieradki biahuć «zdavacca» aŭtachausam, bo vyhadu atrymlivajuć usie.
U 2025 hodzie kiraŭnictva sietki vyrašyła źmienšyć dolu pierakupščykaŭ u ahulnym pirahu svajho biznesu i pačała šukać finansavańnie dla zakupak mašyn samastojna.
Ź vieraśnia 2025 hoda «Bucik-Inviest» vypuściŭ vosiem vypuskaŭ doŭhavych tokienaŭ na płatformach Finstore i BynEX pad ad 5% da 23% hadavych, razam kala 5,2 miljona rubloŭ i $1,7 miljona. Tokieny trymaje bolš za 2000 kredytoraŭ. Jany stali nastolki papularnymi, što apošni vypusk na 2,25 miljona rubloŭ u kancy vieraśnia raschapali ŭsiaho čatyry pakupniki.
Uletku 2026‑ha kampanija pačała raźmiaščać na biržy ablihacyi na 3 miljony rubloŭ, ale vypusk časova spynili.
Bližejšyja vypłaty inviestaram — pracenty 15 listapada i vykup tokienaŭ pa zajaŭkach inviestaraŭ z 1 pa 5 śniežnia.
Ci zmoža vypłacić ich «Bucik-Inviest» — kali ŭ jaho aryštavanyja rachunki — nieviadoma.
Kamientary