Jak hłyboka prasunulisia ŭkraincy ŭ Kurskaj vobłaści da viečara 7 žniŭnia? 

Niekalki bataljonaŭ 22-j miechanizavanaj bryhady USU, uzmocnienyja śpiecnazam i srodkami supraćpavietranaj abarony (i, mahčyma, bataljonami inšych rehularnych bryhad) u noč na 6 žniŭnia pierajšli miažu Kurskaj vobłaści i da viečara 7 žniŭnia hłyboka ŭklinilisia ŭ rasijskuju abaronu.

Im supraćstajali vielmi słabyja siły — pamiežniki i piachota z adnaho sa stvoranych u 2023 hodzie «pałkoŭ prykryćcia miažy», častkova składzienaha z vajskoŭcaŭ terminovaj słužby. Heta značyć, faktyčna miascovaja terabarona amal biez braniatechniki.

Usio, što zmahło supraćpastavić, vierahodna, niečakanaj atacy rasijskaje kamandavańnie — udary avijacyi (samalotaŭ i viertalotaŭ), a taksama ATRK «Iskander» pa ŭkrainskich kałonach, jakija išli ŭ nastupleńnie. Niekalki adzinak braniatechniki USU byli padbityja, ale nastup heta nie spyniła. Byŭ źbity jak minimum adzin rasijski viertalot.

Miarkujučy pa apublikavanych videa, da viečara 7 žniŭnia USU dasiahnuli nastupnych pośpiechaŭ:

• Paśla sutak bajoŭ zachapili prapuskny punkt «Sudža» na miažy Sumskaj i Kurskaj abłaściej. Niekalki dziasiatkaŭ rasijskich pamiežnikaŭ trapili ŭ pałon.
  
  
• Była zachoplenaja hazavymiaralnaja stancyja «Sudža» (častka infrastruktury hałoŭnaha rasijskaha hazapravoda, jaki pampuje haz u Jeŭropu praz terytoryju Ukrainy) za niekalki sotniaŭ mietraŭ ad prapusknoha punkta.
  
  
• Na zachad ad prapusknoha punkta USU chutka prasunulisia ŭhłyb terytoryi Rasii, dasiahnuli darohi Rylsk — horad Sudža ŭ rajonie Śvierdlikava, dzie trapili pad udary rasijskaj avijacyi i apieratyŭna-taktyčnych rakiet.
  
  
• Asnoŭnaja častka hrupoŭki USU paviarnuła pa trasie ŭ napramku Rylska. Byli zachoplenyja vioski Leanidava i Zialony Šlach kala trasy. Rasijskija «vajenkary» paviedamili, što pieradavyja atrady USU dasiahnuli ŭskrain Koranieva dalej pa trasie na Rylsk, ale paćviardžeńniaŭ hetamu niama.
  
  
• Niahledziačy na čutki i paničnyja paviedamleńni «vajenkaraŭ», USU pakul nie ŭvajšli (i, mahčyma, navat nie sprabavali) u samu Sudžu, choć i padyšli da jaje pa mienšaj miery z zachadu (a pa čutkach, i z poŭdnia). Pry hetym kvartały horada byli surjozna paškodžanyja ŭkrainskimi abstrełami. U Sudžy zastajecca šmat mirnych žycharoŭ.
  
  
• Prarvaŭšy pieršuju redkuju liniju abarony, ukrainskija siły, vierahodna, pasprabavali dziejničać u styli Bałaklejska-Kupianskaha nastupleńnia 2022 hoda: pa darohach vakoł Sudžy byli «vykinutyja» šturmavyja i dyviersijnyja hrupy, jakija pasprabavali dezarhanizavać rasijski tył i praduchilić padychod reziervaŭ Uzbrojenych sił RF.
  
  
• Da viečara 7 žniŭnia bujnyja rasijskija reziervy, prybyćcia jakich u rajon praryvu možna było b čakać u pieršyja hadziny abo dni nastupleńnia (u vypadku, kali b jany byli ŭ najaŭnaści ŭ Kurskaj vobłaści), u boj tak i nie ŭstupili.

• 27
• 1
• 4
• 0
• 1
• 0
• 1
• 0