Prezident Finlandyi: Rasijskamu impieryjalizmu nie vidać kanca. Treba być hatovymi da ŭsiaho i nie panikavać
Prezident Finlandyi Alaksandr Stub prakamientavaŭ źmieny ŭ hieapalitycy i vykazaŭ svajo bačańnie na budučyniu NATA ŭ suviazi z abrańniem Donalda Trampa prezidentam ZŠA.
Prezident Finlandyi Alaksandr Stub u subotnim intervju vydańniu Ilta-Sanomat abviaściŭ, što jaho kraina ŭskočyła ŭ NATA «ŭ apošni momant».
«Ja ŭdziačny za heta sajuźnikam. Biezumoŭna, ciapier, kali ty ŭžo ŭ NATA, lahčej dychajecca», — cytuje finskaje vydańnie słovy Stuba.
Palityk taksama dadaŭ, što ŭ sučasnych umovach Finlandyja «nie abaviazkova» atrymała b padtrymku dla členstva ŭ Aljansie. Stub padkreśliŭ, što «jaho acenka vynikaje nie tolki z abrańnia Donalda Trampa prezidentam ZŠA, ale i z vajennaj situacyi va Ukrainie i ahulnaj stomlenaści ad vajny».
«Na siońniašnim etapie było b vielmi ciažka znajści arhumienty, čamu Finlandyja pavinna ŭstupić u NATA, kali, naprykład, pahladzieć na pazicyju Hiermanii. Tamu było vielmi važna zrabić krok da dźviarej [NATA] na rańnim etapie vajny», — padkreśliŭ jon.
Stub taksama pryznaŭ, što Finlandyja, niahledziačy na toje, što znachodzicca ŭ samym mahutnym vajskovym aljansie, pavinna być hatovaja «da absalutna ŭsiaho z boku Rasii».
«Ja nie baču kanca rasijskamu impieryjalizmu, pry jakim terytoryja pašyrajecca niezakonnymi mietadami. (…) Treba być hatovymi absalutna da ŭsiaho, što tyčycca Rasii», —
skazaŭ jon, padkreśliŭšy, što Rasija praciahvaje pieraŭzbrojvacca i praź niekalki hadoŭ zmoža adnavić svoj patencyjał da ŭzroŭniu, jaki mieła na pačatku vajny z Ukrainaj.
Stub adznačyŭ nieabchodnaść psichałahičnaj stojkaści i hatoŭnaści žyć va ŭmovach, kali adsutničaje poŭnaja jasnaść abo stabilnaść:
«Treba być zdolnym vytrymlivać hetuju svojeasablivuju niapeŭnaść. (…) Havaryć ab Treciaj suśvietnaj vajnie abo jadziernaj vajnie nie vielmi razumna. (…) Niama sensu panikavać».
Adpaviedna słovam prezidenta Finlandyi, z novaj eraj Trampa, napeŭna, budzie cisk na partnioraŭ pa NATA, kab jany pavialičyli vydatki na abaronu vyšej za 2% (vydatki Finlandyi składajuć prykładna 2,5%). U toj ža čas Stub nie vieryć u toje, što ZŠA pad kiraŭnictvam Trampa zrobiać radykalny pavarot u palitycy adnosna ŭdziełu ŭ NATA albo svajoj prysutnaści ŭ Jeŭropie.
«Samyja važnyja sajuźniki amierykancaŭ znachodziacca ŭ Jeŭropie», — adznačyŭ Stub. Ale pry hetym jon padkreśliŭ, što «adkaznaść za biaśpieku źmienicca».
Nahadajem, što z pačatkam vajny Rasii va Ukrainie Finlandyja pierahledzieła svoj niejtralny status i padała zajaŭku ab ŭstupleńni ŭ NATA. 4 krasavika 2023 hoda, mienš čym praz hod, jana była pryniata ŭ Aljans. Heta źjaŭlajecca samym chutkim pracesam ustupleńnia ŭ historyi.
Dałučeńnie Finlandyi da NATA ŭzmacniła abaronienaść Centralnaj Jeŭropy i Bałtyi.
Kamientary