Praryŭ u čornaj mietałurhii: novy mietad pavyšaje chutkaść vytvorčaści ŭ 3600 razoŭ
Kitajskija navukoŭcy śćviardžajuć, što ichni mietad vytvorčaści žaleza nie tolki chutki i tanny, ale i biaśpiečny dla navakolnaha asiarodździa.
Jak piša ChemAnalyst.news, paśla bolš čym dziesiaci hadoŭ intensiŭnych daśledavańniaŭ kitajskija navukoŭcy prapanavali technałohiju vytvorčaści žaleza, jakaja hatovaja zrabić revalucyju ŭ suśvietnaj staleliciejnaj pramysłovaści.
Pa słovach inžynieraŭ, jakija ŭdzielničali ŭ prajekcie, mietad zaklučajecca va ŭpyrskvańni zdrobnienaj da parašku žaleznaj rudy ŭ zvyšharačuju pieč, što vyklikaje «vybuchovuju chimičnuju reakcyju».
U vyniku źjaŭlajucca jarka-čyrvonyja kropli vadkaha žaleza, jakija padajuć uniz i źbirajucca na dnie piečy, utvarajučy strumień vysakačystaha žaleza, jakoje možna vykarystoŭvać dla lićcia ci padčas «adnaetapnaj vytvorčaści stali», abychodziačy tradycyjnyja etapy, takija jak płaŭleńnie žaleza ŭ čyhun i pierapracoŭka čyhunu ŭ stal.
Jak adznačajuć aŭtary, im udałosia vyrašyć adnu z klučavych prablem u raspracoŭcy technałohii vytvorčaści žaleza va ŭzvažanym stanie — stvareńnie kanstrukcyi furmy dla raspyleńnia rudy. Hety krytyčna važny kampanient pavinien efiektyŭna raśsiejvać čaścicy žaleznaj rudy ŭ vysokatempieraturnaj piečy dla inicyjacyi nieabchodnaj chimičnaj reakcyi.
Kitajskija vučonyja raspracavali vichravuju furmu, zdolnuju ŭpyrskvać 450 ton čaścic žaleznaj rudy ŭ hadzinu. Reaktar, abstalavany tryma takimi furmami, moža vyrablać 7,11 miljona ton žaleza ŭ hod.
Technałohija, jakuju nazvali fłeš-vytvorčaściu žaleza, dazvalaje zaviaršyć praces za ŭsiaho 3-6 siekund, u adroźnieńnie ad tradycyjnych domiennych piečaŭ, dzie heta zajmaje 5-6 hadzin. U vyniku chutkaść vytvorčaści žaleza pavyšajecca bolš čym u 3600 razoŭ. Daśledčyki taksama paličyli, što ich technałohija moža skaracić spažyvańnie enierhii bolš čym na tracinu.
Novy mietad taksama efiektyŭny dla vykarystańnia rud ź nizkim ci siarednim utrymańniem žaleza, jakija šyroka raspaŭsiudžanyja ŭ Kitai. Najaŭnyja mietady vytvorčaści žaleza zaležać ad rud z vysokim utrymańniem žaleza, i Kitaj vydatkuje značnyja srodki na ich impart z Aŭstralii, Brazilii i Afryki.
Jak adznačajuć vučonyja, prapanavany imi novy mietad vytvorčaści žaleza nie patrabuje vykarystańnia vuhalu, jaki źjaŭlajecca nieabchodnym kampanientam u tradycyjnym pracesie domiennaha płaŭleńnia čyhunu.
Novaja technałohija zdymaje patrebu ŭ vuhalnym koksie, što dazvalaje źmienšyć vykidy vuhlakisłaha hazu i pamienšyć zaležnaść ad vykapniovych krynic enierhii, robiačy vytvorčaść bolš ekałahična čystaj i enierhaefiektyŭnaj. Heta źjaŭlajecca važnym krokam u dasiahnieńni «amal nulavych vykidaŭ vuhlakisłaha hazu» staleliciejnaj halinoju.
Kamientary