Adnoj injekcyi chapiła na 70 dzion. U ZŠA vyprabavali novy padychod da lekaŭ ad atłuścieńnia
Amierykanskija navukoŭcy raspracavali mietad, pry jakim paśla adnoj injekcyi kletki arhanizma sami praciahły čas vypracoŭvajuć rečyvy, padobnyja da papularnych preparataŭ ad atłuścieńnia i dyjabietu. Pakul taki padychod pakazaŭ efiektyŭnaść tolki ŭ daśledavańniach na myšach.
Siońnia leki, jakija imitujuć dziejańnie harmonaŭ GLP-1 i GIP, u tym liku preparaty na asnovie siemahłutydu (Ozempic, Wegovy) i tyrziepatydu (Mounjaro), efiektyŭna vykarystoŭvajucca dla lačeńnia dyjabietu druhoha typu i atłuścieńnia. Ale hetyja rečyvy chutka raspadajucca ŭ arhaniźmie, tamu pacyjentam davodzicca rabić injekcyi štotydzień abo štodnia prymać tabletki. Paśla spynieńnia terapii vaha i pakazčyki hlukozy časta znoŭ paharšajucca.
Daśledčyki z amierykanskaha Instytuta Vistar paviedamili pra raspracavany imi mietad, jaki pieratvaraje čałaviečy arhanizm u «fabryku» dla ŭstojlivaj vypracoŭki antyciełaŭ.
Zamiest taho kab uvodzić užo hatovy preparat, arhanizmu ŭvodziać nievialikuju kalcavuju malekułu DNK (płaźmidu), jakaja źmiaščaje hienietyčnyja instrukcyi dla vypracoŭki patrebnaha białku. Paśla injekcyi vykarystoŭvajecca karotki elektryčny impuls, jaki dapamahaje hetaj DNK trapić u kletki.
Takuju technałohiju daśledčyki ŭžo raniej vypraboŭvali dla praciahłaj vypracoŭki antyciełaŭ suprać COVID-19. U kliničnym daśledavańni pieršaj fazy arhanizm udzielnikaŭ praciahvaŭ vypracoŭvać dva typy antyciełaŭ bolš za 72 tydni.
Ciapier hetuju ž technałohiju adaptavali dla lačeńnia parušeńniaŭ abmienu rečyvaŭ. Navukoŭcy stvaryli hienietyčnyja instrukcyi dla doŭhadziejnych formaŭ harmonaŭ GLP-1 i GIP, dapoŭniŭšy ich frahmientam antycieła, jaki zapavolvaje razbureńnie białkoŭ u arhaniźmie.
U ekśpierymientach na myšach injekcyi novaj DNK-kanstrukcyi chapała da 70 dzion. Dla paraŭnańnia, Ozempic, Wegovy i inšyja preparaty na asnovie siemahłutydu pacyjentam treba ŭvodzić raz na tydzień. Mienavita tamu daśledčyki ličać, što ich padychod moža istotna pamienšyć patrebu ŭ paŭtornych injekcyjach.
Na hetym daśledčyki nie spynilisia. Jany taksama vykarystali strukturnaje madelavańnie i štučny intelekt, kab stvaryć jašče adnu raspracoŭku — novuju sintetyčnuju malekułu pSynCretin. Dla hetaha jany abjadnali ŭ adnym białku strukturnyja asablivaści harmonaŭ GLP-1 i GIP, a taksama isnujučych preparataŭ, jakija dziejničajuć na ich receptary. Atrymanaja malekuła adnačasova ŭździejničaje na receptary GLP-1 i GIP. Taki ž miechanizm dziejańnia maje i Mounjaro. U daśledavańniach na myšach adnarazovaje ŭviadzieńnie pSynCretin taksama zabiaśpiečyła praciahłaje źnižeńnie masy cieła.
Pakul usie vyniki atrymanyja tolki ŭ dakliničnych daśledavańniach. Kab vyśvietlić, ci budzie takaja mietodyka biaśpiečnaj i efiektyŭnaj dla ludziej, nieabchodnyja kliničnyja vyprabavańni.
Ciapier daśledčyki vyvučajuć, ci moža praciahłaje dziejańnie preparataŭ na asnovie GLP-1 i GIP upłyvać nie tolki na abmien rečyvaŭ, ale i na imunnuju sistemu, u tym liku na vyniki lačeńnia raku. Pavodle kliničnych danych, u ludziej, jakija prymajuć takija leki, nazirajecca palapšeńnie pry niekatorych chraničnych zapalenčych zachvorvańniach, u tym liku pry artrycie i psaryjazie. Aŭtary taksama miarkujuć, što ich sposab dastaŭki hienietyčnych instrukcyj moža znajści prymianieńnie i dla praciahłaj vypracoŭki inšych lačebnych białkoŭ pry roznych chraničnych zachvorvańniach.
Kamientary