«My pavinny pryznać, što ŭstupajem u novuju eru». Što abmiarkoŭvali lidary ES na ekstrannym samicie ŭ Paryžy
Lidary jeŭrapiejskich krain praviali ekstranny samit u Paryžy pierad pieramovami administracyi prezidenta ZŠA Donalda Trampa z Maskvoj biez udziełu Jeŭropy. Pra kankretnyja rašeńni pa vynikach sustrečy nie paviedamlałasia, adnak u ES i NATA zajavili pra nieabchodnaść bolš inviestavać u abaronu, a taksama dać Kijevu nadziejnyja harantyi biaśpieki, piša VVS.
U pieramovach brali ŭdzieł lidary Francyi, Brytanii, Hiermanii, Italii, Ispanii, Danii, Polščy, Niderłandaŭ, a taksama kiraŭniki NATA i ES.
«Hatovyja i poŭnyja žadańnia. Takoje majo mierkavańnie pra siońniašniuju sustreču ŭ Paryžy. Jeŭropa hatovaja i choča zrabić krok napierad. Uznačalić nadańnie harantyj biaśpieki dla Ukrainy. Hatovyja ŭkładać značna bolš srodkaŭ u našu biaśpieku. Detali jašče treba vyznačyć, ale abaviazacielstvy zrazumiełyja», — napisaŭ u sacsietcy X hienieralny sakratar NATA Mark Rute.
Pra heta samaje kazaŭ paśla samitu i prezident Francyi Emanuel Makron, jaki arhanizavaŭ sustreču ŭ Paryžy. Pavodle jaho słoŭ, jeŭrapiejcy pavinny «lepš, bolš i razam» inviestavać u abaronu ciapier i ŭ budučyni.
«Dla hetaha jeŭrapiejcy žadajuć paskoryć realizacyju svajoj ułasnaj prahramy pa zabieśpiačeńni suvierenitetu, biaśpieki i kankurentazdolnaści. Praca budzie praciahnutaja na asnovie prapanoŭ Jeŭrakamisii — jak pa padtrymcy Ukrainy, tak i pa raźvićci i inviestavańni ŭ našu abaronu», — zajaviŭ Makron.
Jon taksama paviedamiŭ, što paśla pieramoŭ u Paryžy stelefanavaŭsia z prezidentami ZŠA i Ukrainy — Donaldam Trampam i Uładzimiram Zialenskim.
«My imkniemsia da tryvałaha i doŭhačasovaha miru va Ukrainie. Dla hetaha Rasija pavinna spynić svaju ahresiju, i heta pavinna supravadžacca mocnymi i nadziejnymi harantyjami biaśpieki dla ŭkraincaŭ. U advarotnym vypadku jość ryzyka, što hetaje spynieńnie ahniu skončycca hetak ža, jak Minskija pahadnieńni», — dadaŭ francuzski lidar.
Zialenski taksama raskazaŭ pra razmovu z Makronam.
«Kazali pra hłabalnuju situacyju, situacyju ŭ Jeŭropie i, u pryvatnaści, harantyi biaśpieki dla Ukrainy. U nas ahulnaje bačańnie: pavinny być nadziejnyja, mocnyja harantyi biaśpieki. Luboje inšaje rašeńnie biez takich harantyj, naprykład krochkaje spynieńnie ahniu, stanie tolki čarhovym padmanam z boku Rasii i preludyjaj da novaj rasijskaj vajny suprać Ukrainy ci inšych krain Jeŭropy», — napisaŭ jon u telehramie ŭ paniadziełak uviečary.
Brytanski premjer-ministr Kir Starmier raskazaŭ paśla samitu ŭ Paryžy, što na nastupnym tydni adpravicca ŭ ZŠA, kab abmierkavać z prezidentam ZŠA Donaldam Trampam «klučavyja elemienty doŭhaterminovaha miru».
Starmier adznačyŭ, što ciapier «na kartu pastaŭlena nie tolki budučynia Ukrainy, ale i pytańnie isnavańnia Jeŭropy ŭ cełym». «Tolki tryvały mir va Ukrainie, jaki abaronić jaje suvierenitet, utrymaje Pucina ad dalejšaj ahresii», — zajaviŭ jon.
«U ciapierašni momant my pavinny pryznać, što ŭstupajem u novuju eru, i pierastać bieznadziejna čaplacca za kamfort minułaha. Čas uziać na siabie adkaznaść za našu biaśpieku, za naš kantynient», — dadaŭ premjer-ministr.
Pa słovach Starmiera, u bližejšyja dni jon pahavoryć i z prezidentam Ukrainy Uładzimiram Zialenskim, a zatym jeŭrapiejskija lidary płanujuć pravieści jašče adnu sustreču.
Jon padkreśliŭ, što luboje mirnaje pahadnieńnie pavinna być harantavana ZŠA.
«Harantyi biaśpieki z boku ZŠA — adziny efiektyŭny sposab utrymać Rasiju ad novaha napadu na Ukrainu», — skazaŭ brytanski premjer.
Starmier taksama paŭtaryŭ, što razhledzić mahčymaść raźmiaščeńnia brytanskich vojskaŭ va Ukrainie ŭ vypadku zaklučeńnia tryvałaha mirnaha pahadnieńnia.
Jak pisała napiaredadni Financial Times, u chodzie sustrečy ŭ Paryžy niekatoryja jeŭrapiejskija lidary (pierš za ŭsio Hiermanija, Polšča i Ispanija) zajavili pra svajo niežadańnie nakiroŭvać miratvorčyja siły va Ukrainu.
Spasyłajučysia na troch čynoŭnikaŭ, jakija ŭdzielničali ŭ padrychtoŭcy sustrečy, hazieta paviedamlała, što Francyja prapanavała abmierkavać stvareńnie «sił zabieśpiačeńnia», jakija buduć raźmieščanyja za linijaj bajavoha sudakranańnia, a nie na joj.
Kiraŭnik MZS Ispanii Chase Manuel Albares skazaŭ, što «nichto ciapier nie razhladaje mahčymaść adpraŭki vojskaŭ va Ukrainu». Varšava taksama nie hatovaja nakiravać vojski va Ukrainu, paćvierdziŭ premjer-ministr Polščy Donald Tusk.
Kancler Hiermanii Ołaf Šolc zachavaŭ aściarožnaść u pytańni razhortvańnia vojskaŭ va Ukrainie, zajaviŭšy, što debaty pa hetym pytańni zaŭčasnyja, adznačaje FT.
Šolc, jaki pieršym ź jeŭrapiejskich lidaraŭ vystupiŭ pierad žurnalistami paśla pieramoŭ u Jelisiejskim pałacy, znoŭ zajaviŭ pra nieabchodnaść praciahvać padtrymku Ukrainy.
«My vitajem razmovy pra mirnaje pahadnieńnie, ale dla nas vidavočna, što heta nie moža być dyktat», — skazaŭ Šolc.
Pavodle jaho słoŭ, Hiermanija budzie praciahvać inviestavać u abaronu, a Jeŭrasajuz pavinien stać bolš hnutkim u pytańniach biudžetu, kali jaho členy płanujuć tracić na abaronu bolš jak 2 pracenty VUP.
Kamientary