Raskošnaja arendnaja kvatera, płastyka tvaru i hvałt nad 60 žančynami

Hramadzianin Kitaja Čžeńchaa Czou (Zhenhao Zou) pryjechaŭ u Vialikabrytaniju ŭ vieraśni 2017 hoda dla atrymańnia vyšejšaj adukacyi. Paralelna z vučobaj jon znajomiŭsia z žančynami. Da čaho pryvodzili sustrečy, raskazvaje vydańnie The Telegraph.

Paviedamlajecca, što Czou — syn bahataha biznesmiena z kitajskaha horada Dunhuań, raźmieščanaha ŭ pravincyi Huandun. Maci jaho pracavała nastaŭnicaj. Pieršapačatkova chłopiec vučyŭsia na bakałaŭryjacie va ŭniviersitecie Kvins u Biełfaście ŭ Paŭnočnaj Irłandyi. Praz dva hady pierajšoŭ va Univiersitecki kaledž Łondana, dzie pačaŭ navučańnie pa prahramie mahistratury, a paźniej aśpirantury.

U stalicy Vialikabrytanii małady čałaviek za niekalki tysiač funtaŭ sterlinhaŭ arandavaŭ raskošnuju kvateru ŭ novym žyłym kompleksie na poŭdni, zrabiŭ sabie pierasadku vałasoŭ, karekcyju paviek i padbarodku. Padčas pieratrusu ŭ jaho kvatery palicyja znajšła vialikuju kolkaść dyzajnierskaha adzieńnia, pradmietaŭ raskošy i darahich hadzińnikaŭ.

Palicejskija charaktaryzujuć maładoha čałavieka jak vielmi kamunikabielnaha, adznačajuć, što ŭ jaho vydatnaja anhlijskaja mova, šyrokaje koła siabroŭ i znajomych jak siarod kitajskaj dyjaspary, tak i studenckaj supolnaści.

Praz roznyja dadatki dla znajomstvaŭ i papularnyja kitajskija sacyjalnyja sietki Czou zaprašaŭ dziaŭčat, bolšaść ź jakich byli jaho znajomymi z kitajskaj studenckaj supolnaści, razam pasiadzieć u bary ci ŭ jaho doma.

U mai 2023 hoda Czou aryštavali paśla taho, jak adna žančyna zajaviła, što mužčyna padpaiŭ jaje i zhvałtavaŭ.

Śledčym daviałosia vyvučyć zvyš dzieviaci miljonaŭ paviedamleńniaŭ u sacyjalnych sietkach Czou na kitajskaj movie i praanalizavać zvyš 1600 hadzin videazapisaŭ.

Vyjaviłasia, što Czou sistematyčna vykarystoŭvaŭ ałkahol i narkotyki, kab davieści achviar da biaspamiactva, a zatym ździajśniaŭ nad imi hvałt. Bolš za toje, jon časta zdymaŭ svaje złačynstvy na videa, zachoŭvajučy hetyja zapisy jak «suvieniry». Aproč taho, Czou ŭ jakaści «trafiejaŭ» zachoŭvaŭ asabistyja rečy svaich achviar. Heta mahli być upryhožańni, adzieńnie abo inšyja pradmiety.

U chodzie śledstva ŭdałosia dakazać hvałtoŭnyja dziejańni ŭ dačynieńni da dziesiaci žančyn. Adnak palicyja padazraje, što ich našmat bolej. Videazapisy śviedčać pra toje, što za piać hadoŭ Czou adurmaniŭ i zhvałciŭ zvyš 60 žančyn. Kala pałovy zhvałtavańniaŭ adbylisia ŭ jahonaj kvatery ŭ Łondanie, a astatnija — u Kitai padčas jaho pajezdak dachaty.

Padčas śledstva Czou zajaŭlaŭ, što jaho cikavić parnahrafija ŭ žanry time stop, dzie žančyny vyhladajuć pasiŭnymi i nie reahujuć na dotyki, ruchi abo lubyja inšyja dziejańni, jakija adbyvajucca ź imi. Pavodle jaho słoŭ, usie ŭdzielnicy videazapisaŭ dobraachvotna zhadžalisia na intymnuju suviaź, a abvinavačvańni ŭ zhvałtavańni jon całkam admaŭlaŭ.

Paviedamlajecca, što, niahledziačy na zamiežnaje hramadzianstva Czou i toje, što niekatoryja złačynstvy byli ździejśnienyja za miažoj, jaho mohuć pryciahnuć da adkaznaści ŭ Vialikabrytanii dziakujučy źmienam u zakanadaŭstvie adnosna seksualnych złačynstvaŭ.

Palicyja baicca, što niekatoryja achviary Czou mohuć navat nie viedać, što stali achviarami zhvałtavańnia, bo jon napadaŭ na ich, kali jany byli biez prytomnaści.

Ułady zaklikajuć žančyn, jakija viedali chłopca z 2019 hoda, źviarnucca da śpiecyjalna padrychtavanych aficeraŭ, harantavaŭšy poŭnuju kanfidencyjnaść. Taksama Skotłand-Jard stvaryŭ śpiecyjalny partał i haračuju liniju, dzie pracujuć apieratary, jakija razmaŭlajuć na kitajskaj movie.

• 4
• 1
• 4
• 9
• 7
• 1
• 21
• 0