«Situacyju źmianili vajskoŭcy z KNDR». Što ciapier adbyvajecca ŭ Kurskaj vobłaści
Rasijskaja armija prarvałasia praz ukrainskuju miažu abarony na poŭdzień ad Sudžy ŭ Kurskaj vobłaści pierš za ŭsio siłami vajskoŭcaŭ z KNDR i ŭ vyniku masavaha vykarystańnia rasijskich dronaŭ na optavałaknie. Pra heta vydańniu «Suśpilnie» raskazaŭ vajskoviec adnaho z padraździaleńniaŭ, jakija znachodziacca ŭ Kurskaj vobłaści.
«Situacyja raźvivajecca nie na našu karyść. 95% strat techniki i ahniavych pazicyj u našych padraździaleńniach — heta varožyja drony na optavałaknie», — kaža krynica vydańnia.
Vajskoviec taksama prakamientavaŭ sprobu pierakinuć hrupu praz hazapravod «Prahres»:
«Tam nastupali vajskoŭcy KNDR, u razy lepš navučanyja, čym da taho, i dziejničajuć jany bolš zładžana. Miesca praryvu [siły abarony] adrazu ŭziali pad ahniavy kantrol, asnoŭnuju nastupalnuju siłu raźbili. [ … ] U cełym situacyju mahli b stabilizavać śviežyja siły z našaha boku, ale ich niama».
Inšy vajskoviec, padraździaleńnie jakoha trymaje abaronu pamiž Žuraŭkaj i Basoŭkaj u Sumskaj vobłaści (rajon KPP «Sudža») skazaŭ, što raniej rasijskim vojskam udałosia prarvać miažu ŭ hetym rajonie. Ciapier tam šeraja zona i praciahvajecca začystka.
«Miažu prarvali vyklučna kvadracykłami, biez vykarystańnia ciažkaj techniki. U momanty šturmu varožaja artyleryja nakryvała najbližejšyja pasadki z našymi pazicyjami, što nie dazvalała efiektyŭna pracavać našym piłotam dronaŭ i minamiotnikam», — kaža jon.
Centr supraćdziejańnia dezynfarmacyi Rady nacyjanalnaj biaśpieki Ukrainy paviedamiŭ, što masavaha praryvu miažy pamiž Novieńkimi i Žuraŭkaj na Sumščynie nie fiksavali.
U noč na 7 sakavika analityčny prajekt DeepState paviedamiŭ ab prasoŭvańni rasijskich vojskaŭ u Kurskaj vobłaści. Rasijskija vojski zasiarodzili namahańni na ahniavym kantroli darohi Sumy — Junakoŭka — Sudža.
U apieratyŭna-techničnaj hrupoŭcy «Kursk» vydańniu «Suśpilnie» paćvierdzili, što maštabnyja šturmavyja dziejańni z boku rasijskich vajskoŭcaŭ adbylisia na kirunkach z nasielenaha punkta Koranieva na Sudžu, a taksama na kirunkach Novaivanaŭka, Małaja Łoknia i na poŭdzień ad horada Sudža.
USU paviedamlajuć pra źniščeńnie «vialikaj hrupy dyviersantaŭ» u tuneli
Rasijskija vojski pačali šturm Sudžy
100 rasijan dajšli da Sudžy pa trubie hazapravoda i nie ŭzarvalisia
Ukraina praspała dronavuju revalucyju? Čamu optavałakonnyja drony mianiajuć mnohaje na poli boju
Ukrainskija vajskoŭcy pačali vykarystoŭvać bieśpiłotniki z vałakonna-aptyčnym kanałam kiravańnia
Ciapier čytajuć
Stała viadomaja asoba rabočaha «Biełaruśkalija», jaki zahinuŭ pry abrušeńni hornaj parody1
Kamientary