«Pucin vidavočna baicca», — kaža Jan Lipaŭski.
Niaŭdzieł prezidenta Rasii Uładzimira Pucina ŭ pramych pieramovach z ukrainskim bokam u Stambule, kudy jon nakiravaŭ svajho daradcu Uładzimira Miadzinskaha, śviedčyć pra bajaźlivaść kiraŭnika Kramla. Pra heta ŭ čaćvier pierad niefarmalnaj sustrečaj ministraŭ zamiežnych spraŭ krain NATA ŭ Antalji zajaviŭ ministr zamiežnych spraŭ Čechii Jan Lipaŭski, paviedamlaje Češskaje radyjo.
Čakanyja na siońnia pramyja pieramovy pamiž Rasijaj i Ukrainaj stali adnoj z hałoŭnych tem pasiadžeńnia kiraŭnikoŭ MZS krain NATA. U toj čas jak prezident Ukrainy Uładzimir Zialenski prapanoŭvaŭ asabistuju sustreču z Pucinym, Maskva doŭhi čas nie vykazvałasia nakont farmatu pieramovaŭ. U sieradu Kreml abviaściŭ, što rasijskuju delehacyju ŭznačalić Miadzinski.
«Pytańnie ŭ tym, ci možna heta naohuł nazvać mirnymi pieramovami. Pucin vidavočna baicca. Jon pasłaŭ adnu ź ideałahičnych fihur, i heta ŭžo samo pa sabie sihnał taho, jak jon da hetaha stavicca — h.zn. nie nadta stanoŭča», — skazaŭ Lipaŭski pra stambulskija pieramovy.
Tak, naprykład, ministr zamiežnych spraŭ Estonii Marhus Cachkna siońnia paraŭnaŭ nakiravańnie rasijskaj delehacyi takoha nizkaha ŭzroŭniu z aplavuchaj.
«Heta chutčej prajava bajaźlivaści Pucina», — dadaŭ Lipaŭski.
Ministry zamiežnych spraŭ, prybyvajučy na pasiadžeńnie, vykazali ahulnuju dumku pra toje, što dziejańni Rasii nie śviedčać ab žadańni Maskvy pajści na kampramis. Jany taksama havaryli pra toje, što pryjšoŭ čas uzmacnić cisk na Rasiju. «Jeŭrapiejskija lidary adnaznačna zajavili, što mohuć paśledavać novyja sankcyi», — adznačyŭ Lipaŭski.
Kamientary