U Biełarusi źjavicca jašče adzin ahrehatar taksi. Na hety raz na hety rynak našaj krainy vyrašyŭ zajści servis BroCar z Kazachstana.
Jak vyśvietliŭ Office Life, u Biełarusi servis budzie raźvivać kampanija «Brokar Bieł». Niadaŭna jaje zarehistravali ŭ rejestry pieravozčykaŭ pasažyraŭ jak dyśpietčara.
Jaje asnoŭny vid dziejnaści — apracoŭka danych, pradastaŭleńnie pasłuh pa raźmiaščeńni infarmacyi i źviazanaja z hetym dziejnaść.
Kampanija była stvorana 14 maja 2025 hoda ŭ vioscy Baravaja Minskaj vobłaści. Jaje adzinym zasnavalnikam ukazana tavarystva z abmiežavanaj adkaznaściu «Eviery Kar» z Kazachstana. Kiravać ža servisam u Biełarusi budzie były mieniedžar sietki taksi «Maksim» u Mahilovie Siarhiej Kurnievič.
Ahrehatar taksi Bro Car źjaviŭsia na rynku ŭ kancy 2022 hoda. Sama ž kampanija «Eviery Kar» była zarehistravanaja ŭ pačatku červienia 2023 hoda ŭ Astanie.
U adroźnieńni ad inšych ahrehataraŭ taksi «fiška» Bro Car ŭ dahavornym cenaŭtvareńni. Naprykład, «Jandeks. Taksi» vykarystoŭvaje dynamičnaje cenaŭtvareńnie i samastojna ŭstanaŭlivaje canu za pajezdku ŭ zaležnaści ad popytu i inšych faktaraŭ, paśla čaho pieradaje zakaz kiroŭcam.
Dadatak Bro Car ž dazvalaje karystalnikam samastojna stavić canu na pajezdku, padvyšajučy abo źnižajučy jaje ŭ zaležnaści, naprykład, ad bahažu. Paśla čaho pieradaje zakaz kiroŭcam, jakija taksama zmohuć pastavić svaju canu za pajezdku.
Pakul hety servis pracuje ŭ Kazachstanie i Azierbajdžanie. Kali jaho zapuściać u Biełarusi, nie viadoma.
17 červienia «Brokar Bieł» adkryła svoj filijał u horadzie Sianno Viciebskaj vobłaści. Pry hetym ciapier kampanija šukaje jurysta ŭ Viciebsku z zarobkam ad 2,5 tys.rubloŭ u miesiac na ruki. U abaviazki kandydata ŭvachodziać praca z damovami, karparatyŭnaje prava, pradstaŭleńnie intaresaŭ kampanii ŭ sudach, udzieł u sprečkach ź biełaruskimi dziaržorhanami.
U apisańni ž kampanii na rabota.by skazana, što «Brokar» — heta novy ahrehatar i dyśpietčar, sa svajoj infarmacyjnaj sistemaj, jaki stvaraje technałahičnaje rašeńnie dla rynku pieravozak i imkniecca zrabić hety praces zručnym, biaśpiečnym i vyhadnym dla ŭsich udzielnikaŭ.
U Biełarusi ŭžo pracuje niekalki bujnych ahrehataraŭ taksi ad rasiejskaha «Jandeksa» i telekamunikacyjnaha apieratara A1. Ab vychadzie apošniaj na rynak pisałasia ŭ siaredzinie sakavika. Tady ŭ kampanii raspaviadali, što aceńvajuć abjom rynku taksi ŭ Biełarusi ŭ 1,3 młrd rubloŭ u hod. Pry hetym, pavodle jaje acenki, servis ad «Jandeksa» na toj momant zajmaŭ 90% rynku.
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary