У Беларусі з'явіцца яшчэ адзін агрэгатар таксі. На гэты раз на гэты рынак нашай краіны вырашыў зайсці сэрвіс BroCar з Казахстана.
Як высветліў Office Life, у Беларусі сэрвіс будзе развіваць кампанія «Брокар Бел». Нядаўна яе зарэгістравалі ў рэестры перавозчыкаў пасажыраў як дыспетчара.
Яе асноўны від дзейнасці — апрацоўка даных, прадастаўленне паслуг па размяшчэнні інфармацыі і звязаная з гэтым дзейнасць.
Кампанія была створана 14 мая 2025 года ў вёсцы Баравая Мінскай вобласці. Яе адзіным заснавальнікам указана таварыства з абмежаванай адказнасцю «Эверы Кар» з Казахстана. Кіраваць жа сэрвісам у Беларусі будзе былы менеджар сеткі таксі «Максім» у Магілёве Сяргей Курневіч.
Агрэгатар таксі Bro Car з'явіўся на рынку ў канцы 2022 года. Сама ж кампанія «Эверы Кар» была зарэгістраваная ў пачатку чэрвеня 2023 года ў Астане.
У адрозненні ад іншых агрэгатараў таксі «фішка» Bro Car ў дагаворным цэнаўтварэнні. Напрыклад, «Яндэкс. Таксі» выкарыстоўвае дынамічнае цэнаўтварэнне і самастойна ўстанаўлівае цану за паездку ў залежнасці ад попыту і іншых фактараў, пасля чаго перадае заказ кіроўцам.
Дадатак Bro Car ж дазваляе карыстальнікам самастойна ставіць цану на паездку, падвышаючы або зніжаючы яе ў залежнасці, напрыклад, ад багажу. Пасля чаго перадае заказ кіроўцам, якія таксама змогуць паставіць сваю цану за паездку.
Пакуль гэты сэрвіс працуе ў Казахстане і Азербайджане. Калі яго запусцяць у Беларусі, не вядома.
17 чэрвеня «Брокар Бел» адкрыла свой філіял у горадзе Сянно Віцебскай вобласці. Пры гэтым цяпер кампанія шукае юрыста ў Віцебску з заробкам ад 2,5 тыс.рублёў у месяц на рукі. У абавязкі кандыдата ўваходзяць праца з дамовамі, карпаратыўнае права, прадстаўленне інтарэсаў кампаніі ў судах, удзел у спрэчках з беларускімі дзяржорганамі.
У апісанні ж кампаніі на rabota.by сказана, што «Брокар» — гэта новы агрэгатар і дыспетчар, са сваёй інфармацыйнай сістэмай, які стварае тэхналагічнае рашэнне для рынку перавозак і імкнецца зрабіць гэты працэс зручным, бяспечным і выгадным для ўсіх удзельнікаў.
У Беларусі ўжо працуе некалькі буйных агрэгатараў таксі ад расейскага «Яндэкса» і тэлекамунікацыйнага аператара А1. Аб выхадзе апошняй на рынак пісалася ў сярэдзіне сакавіка. Тады ў кампаніі распавядалі, што ацэньваюць аб'ём рынку таксі ў Беларусі ў 1,3 млрд рублёў у год. Пры гэтым, паводле яе ацэнкі, сэрвіс ад «Яндэкса» на той момант займаў 90% рынку.
Цяпер чытаюць
Пра што маўчыць Аляксей Францкевіч, якому Польшча закрыла ўезд на 10 гадоў78
Каментары