Ziemlatrus u Afhanistanie: kolkaść achviar pieravysiła 1100, zachodnija krainy hatovy akazać dapamohu
U Afhanistanie ŭ aŭtorak ranicaj adnaviłasia vyratavalnaja apieracyja paśla adnaho z samych mocnych ziemlatrusaŭ u historyi krainy, u vyniku jakoha zahinuli bolš za 1100 čałaviek i niekalki tysiač paciarpieli. Ratavalniki sprabujuć dabracca da najbolš paciarpiełych ad ziemlatrusu ciažkadastupnych hornych rajonaŭ, paviedamlaje Bi-bi-si.
Kolkaść zahinułych u vyniku mocnaha ziemlatrusu ŭ Afhanistanie ŭzrasła da 1124, paviedamiła ŭ aŭtorak Afhanskaje tavarystva Čyrvonaha Paŭmiesiaca.
Pavodle danych arhanizacyi, u vyniku stychijnaha biedstva paciarpieli prynamsi 3251 čałaviek, bolš za 8000 damoŭ byli źniščany. Ratavalnyja kamandy praciahvajuć pošuk vyžyłych.
Šmat miascovych žycharoŭ praviali noč pad adkrytym niebam.
Bolšaść zahinułych byli žycharami hornaj pravincyi Kunar, jakaja znachodziłasia najbližej da epicentru ziemlatrusu, što adbyŭsia pozna ŭviečary ŭ niadzielu.
Aficyjnyja asoby papiaredžvajuć, što kolkaść zahinułych moža pavialičycca, bo byli źniščany cełyja vioski. Zachodnija krainy vykazali hatoŭnaść akazać dapamohu ŭ likvidacyi nastupstvaŭ ziemlatrusu.
Brytanija vydzieliła 1 miljon funtaŭ sterlinhaŭ, pry hetym Ministerstva zamiežnych spraŭ krainy padkreśliła, što srodki buduć nakiravanyja praz partnioraŭ, kab dapamoha nie trapiła ŭ ruki kirujučaha ŭ Afhanistanie ruchu «Taliban».
Pavodle słoŭ kiraŭnika Foryn-ofisa Devida Łemi, ekstrannaje finansavańnie «dapamoža partnioram dastavić nieabchodnuju miedycynskuju dapamohu i pradmiety pieršaj nieabchodnaści tym, chto paciarpieŭ najbolš». Nadaść humanitarnuju dapamohu taksama paabiacali Kitaj, Indyja i Šviejcaryja.
Ministr zamiežnych spraŭ Indyi Subramanjam Džajšankar zajaviŭ, što jaho kraina dastaviła tysiaču namiotaŭ u Kabuł i pieravozić 15 ton praduktaŭ u Kunar, u aŭtorak čakajecca adpraŭka dadatkovych humanitarnych hruzaŭ.
AAN vydzieliła 5 młn dalaraŭ praz svoj fond reahavańnia na nadzvyčajnyja situacyi (CERF).
Doktar z horada Asadabad raspavioŭ Newshour, što jaho nievialiki špital pryniaŭ bolš za 200 čałaviek, choć raźličany na 150 pacyjentaŭ.
«Čyrvony Kryž prapanuje dapamohu, ale nieabchodna bolš dapamohi», — skazaŭ jon.
Pavodle słoŭ miedyka, niahledziačy na abiacańni zachodnich krain akazać dapamohu Afhanistanu, «pakul my ničoha nie atrymali».
«Mižnarodnaja supolnaść pavinna adkłaści ŭ bok lubyja razychodžańni z «Talibanam» i dapamahčy afhancam, dasłaŭšy im humanitarnuju dapamohu, — dadaŭ jon. — Tysiačy ludziej zastalisia biez svaich damoŭ. Nam patrebny namioty. Nam patrebnyja leki».
Jak adznačaje AFP, biedstva razhortvajecca na fonie zmročnych pierśpiektyŭ finansavańnia humanitarnaj dapamohi.
Z momantu viartańnia talibaŭ da ŭłady ŭ 2021 hodzie zamiežnaja dapamoha Afhanistanu rezka skaraciłasia, što padarvała i biez taho abmiežavanyja mahčymaści hetaj adnoj z najbiadniejšych krain śvietu reahavać na stychijnyja biedstvy, u tym liku ziemlatrusy, jakija adbyvajucca rehularna.
ZŠA byli najbujniejšym donaram Afhanistanu da pačatku 2025 hoda, kali paśla prychodu da ŭłady prezidenta Donalda Trampa byli admienieny amal usie prahramy padtrymki, piša ahienctva.
Pavodle dadzienych Prahramy raźvićcia AAN, kala 85% nasielnictva Afhanistanu žyvie mienš čym na adzin dalar u dzień.
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary