Paradzich voziać z Chojnikaŭ u Rečycu, ź Vilejki ŭ Maładziečna. Va ŭsioj Biełarusi začyniajuć raddamy

Niaprostaja situacyja z dostupam da miedycyny skłałasia ŭ Kalinkavičach. Tam kolki hadoŭ idzie ramont rajonnaj balnicy, jašče i začynili radzilnaje adździaleńnie. Paradzicham zahadana jechać u Mazyr. Ale prablema ŭ tym, što most, jaki złučaje Mazyr i Kalinkavičy, užo 2 hady znachodzicca na rekanstrukcyi. Šlach u abjezd zajmaje ŭ niekalki razoŭ bolš času. Naprykład, praciahłaść maršrutu №6, jaki złučaŭ mikrarajon «Zarečny» z «macierykovym» Mazyrom, pavialičyłasia bolš čym u 4 razy, čas šlachu — u 3 razy.

Mazyrski raddom pierapoŭnieny, bo tudy ž nakiroŭvajuć naradžać žančyn ź Jelska, Naroŭli i Žytkavič.

Žychary Kalinkavič niezadavolenyja situacyjaj. «Maja dačka šmat razoŭ lažała na zachavańni, vielmi ciažka pieranosiła ciažarnaść, a tut jašče i radzilnaje adździaleńnie zakryli ŭ našych Kalinkavičach i hiniekałahičnaje adździaleńnie. Kali pačalisia schvatki, treba było vieźci jaje na mašynie da raddoma ŭ Mazyry, i my ŭsiu darohu pieražyvali, što nie paśpiejem. Jašče i raddom u Mazyry byŭ pierapoŭnieny. Dumaju, heta cud, što jana ŭvohule nie naradziła pa darozie, bo my jechali ŭ abjezd, praz novy most», — raspaviała žycharka adnoj ź viosak Kalinkavickaha rajona.

U kamientaryjach ab zakryćci raddoma ŭ Kalinkavičach ludzi padzialilisia nabalełym: situacyja z zakryćciom raddamoŭ datyčycca nie tolki rajcentra, a ŭsioj Biełarusi. Tak, začynieny raddom u Vilejcy i jeździć treba ŭ Maładziečna. Začynieny radzilnyja adździaleńni ŭ Hłybokim i Dokšycach, choć miascovyja žychary i byli suprać. Z Chojnikaŭ naradžać jeduć u Rečycu, a heta 60 kiłamietraŭ, z Pružan i Hancavič — u Baranavičy.

U Połacku raddom budavali 12 hadoŭ, ale ŭ 2024 jaho ŭsio ž taki źnieśli i prapanavali paradzicham jechać u Navapołack. Tudy ž nakiravali i žančyn z Hłybokaha i Dokšycaŭ.

Naradžalnaść jak na vajnie

U 2024 hodzie ŭ Biełarusi naradziłasia 58 993 dziaciej, što na 8,7% mienš, čym u 2023. Naradžalnaść u Biełarusi ŭ pieraliku na 1000 žycharoŭ ciapier znachodzicca prykładna na takim ža ŭzroŭni, jak naradžalnaść va Ukrainie padčas vajny. Va Ukrainie ŭ 2024 hodzie naradziłasia 177 tysiač dziaciej, što składaje 6 na 1000 žycharoŭ. U Biełarusi — 59 tysiač dziaciej, što składaje prykładna 6,6 na 1000 žycharoŭ.

Kali ŭ 2016 hodzie ŭ Biełarusi na śviet źjaviłasia 117 779 dziaciej, to ŭ 2024 naradziłasia ŭsiaho 58 938. Naradžalnaść u krainie za vosiem hadoŭ skaraciłasia ŭdvaja.

Pavodle prahnozaŭ AAN, nasielnictva Biełarusi moža skaracicca ŭdvaja da 2100 hoda i składzie prykładna 4,5 miljona čałaviek.

• 3
• 0
• 1
• 2
• 1
• 0
• 2
• 0