Za raspaŭsiud kramloŭskaj prapahandy ŭ Daminikanie zatrymali 25‑hadovaha rasijanina
Dźmitryj Novikaŭ uznačalvaŭ u krainie sietku, jakaja zajmałasia «stvareńniem i raspaŭsiudžvańniem ličbavaha kantentu, aryjentavanaha na kampanii palityčnaj dezynfarmacyi i manipulacyi ŭ sacyjalnych sietkach».
Za raspaŭsiud kramloŭskaj prapahandy ŭ Daminikanskaj Respublicy zatrymali 25‑hadovaha rasijanina, jaki źviazany z «Fabrykaj trolaŭ» Pryhožyna, piša Astra.
«Dziaržaŭnaje ministerstva razam z Metavaj hrupaj pa baraćbie z arhanizavanaj złačynnaściu aryštavali hramadzianina Rasii, źviazanaha z «Łachtaj» abo «Kampanijaj», prajektam, nakiravanym na pašyreńnie dezinfarmacyi, jaki ŭžo byŭ rasśledavany ŭ takich krainach, jak Arhiencina abo ZŠA. 25‑hadovy Dźmitryj Novikaŭ byŭ aryštavany padčas apieracyi na vile ŭ žyłym rajonie Palmas-del-Sol II u Bavara, Ła-Altahrasija, dzie jon žyŭ sa svaimi svajakami», — havorycca ŭ pres-relizie viedamstva.
Pavodle viersii daminikanskaj prakuratury, Novikaŭ uznačalvaŭ u krainie sietku, jakaja zajmałasia «stvareńniem i raspaŭsiudžvańniem ličbavaha kantentu, aryjentavanaha na kampanii palityčnaj dezinfarmacyi i manipulacyi ŭ sacyjalnych sietkach».
Raniej pra vyjaŭleńnie špijonskaj sietki, źviazanaj z rasijskim prajektam «Łachta», paviedamlali ŭ Arhiencinie. Prajekt byŭ zasnavany Pryhožynym i źviazany ź jaho «Fabrykaj trolaŭ», pisali ŚMI. U BBC paviedamlali, što ŭ niejki momant pryhažynskaje «Ahienctva internet-daśledavańniaŭ», jakoje i było «Fabrykaj trolaŭ», vyrasła ŭ novy, ale pa sutnaści toj samy prajekt «Łachta».
Pavodle viersii prakuroraŭ Daminikanskaj Respubliki, Novikaŭ utoiŭ svajo rasijskaje hramadzianstva, upłyvaŭ na hramadskuju dumku ŭ krainie, prasoŭvajučy prapahandu, «atrymlivajučy pry hetym srodki i ŭkazańni ad tych, chto źviazany z vyšejzhadanym prajektam». Jaho taksama abvinavacili ŭ ŭtojvańni pachodžańnia resursaŭ i sadziejničańni niezakonnaj dziejnaści, źviazanaj z admyvańniem hrošaj i transnacyjanalnym finansavańniem. Taksama rasijanina abvinavačvajuć u prodažy i raspaŭsiudžvańni ahniastrelnaj zbroi, havorycca ŭ pres-relizie.
Kamientary