U Rasii zabłakavali internet-roŭminh dla biełarusaŭ praz strach pierad ukrainskimi dronami. Ci dapamoža?
Z 6 kastryčnika biełarusy, što ŭjazdžajuć u Rasiju, sutyknulisia tam z novymi abmiežavańniami: u pieršyja sutki paśla padklučeńnia da rasijskaj mabilnaj sietki ŭ ich nie pracuje mabilny internet i SMS. Takuju błakiroŭku ŭviali rasijskija apieratary pa rasparadžeńni ŭładaŭ, nie papiaredziŭšy biełaruski bok.
Zvanki pry hetym zastajucca dastupnymi, ale praz 24 hadziny internet znoŭ uklučajecca. Kali paśla hetaha SIM-karta nie prajaŭlaje aktyŭnaści try dni, błakiroŭku znoŭ uklučać na sutki.
Pryčyna abmiežavańnia — baraćba z dronami, što mohuć vykarystoŭvać SIM-karty dla suviazi ź internetam i naviadzieńnia na celi.
U žniŭni rasijski ministr ličbavaha raźvićcia Maksut Šadajeŭ paćvierdziŭ, što hetyja zachady nakiravanyja na supraćdziejańnie bieśpiłotnikam z zamiežnymi SIM-kartami. Ekśpierty adznačajuć, što častka bajavych dronaŭ sapraŭdy maje mabilnyja moduli, chacia niekatoryja vykarystoŭvajuć inšyja kanały suviazi.
Viersiju z procidziejańniem bieśpiłotnikam paćviardžali ekśpierty, u tym liku hienieralny dyrektar kampanii «Fłaj Dron», nahadvaje «Fłahštok». Jon adznačaŭ, što mnohija bajavyja drony, jakija zapuskajucca na dalokija adlehłaści, majuć sim-karty. Jany ŭšyty ŭ błok kiravańnia dla padłučeńnia da internetu i ručnoha naviadzieńnia na cel u finalnaj fazie palotu, jakaja moža składać ad niekalkich dziasiatkaŭ kiłamietraŭ da niekalkich mietraŭ.
Ale ekśpiert nahadvaŭ, što nie ŭsie drony vykarystoŭvajuć zamiežnyja sim-karty: u niekatoryja staviać rasijskija sim-karty, a inšyja mohuć kiravacca pa radyjokanale, spadarožniku abo pracavać na aŭtapiłocie.
Raniej u RF uvodzili adklučeńnie mabilnaha internetu pry ŭkrainskich atakach.
Nakolki dziejsnaj budzie novaja miera — pakul niezrazumieła. Ale viadoma, što ŭžo paśla błakavańnia, u noč 7 kastryčnika, Ukraina ździejśniła nalot amal 200 dronaŭ na RF: vybuchi byli čutnyja ŭ Nižnim Noŭharadzie, Biełharadzie i Jarasłaŭli.
Kamientary