MZS zaklikała ES viarnucca ŭ rečyšča dyjałohu i źniać usie abmiežavańni
Biełaruś zaklikaje ES viarnucca ŭ rečyšča dyjałohu i źniać usie niezakonnyja abmiežavańni, zajaviŭ namieśnik ministra zamiežnych spraŭ Ihar Siekreta padčas vystupleńnia na ŭniviersalnym pieryjadyčnym ahladzie pa pravach čałavieka ŭ Ženievie, piša BiełTA.
Biełaruś na mierapryjemstvie pradstaŭlenaja delehacyjaj, u skład jakoj uvajšli ŭpaŭnavažany ŭ spravach relihij i nacyjanalnaściej, pradstaŭniki Hienprakuratury, Nacyjanalnaha statystyčnaha kamitetu, MZS, ministerstvaŭ infarmacyi, justycyi, pracy i sacyjalnaj abarony.
Ihar Siekreta padkreśliŭ, što Biełaruś źjaŭlajecca sacyjalna aryjentavanaj dziaržavaj, dzie «ŭ centry ŭvahi čałaviek, jaho intaresy i patreby, a ŭ krainie efiektyŭna pracuje raźvitaja sistema śpiecyjalizavanych dziaržaŭna-hramadskich instytutaŭ pa abaronie i stymulavańni roznych katehoryj pravoŭ čałavieka».
«Sistema sacyjalnaj abarony zasłužana zastajecca vizitnaj kartkaj našaj krainy. Dziakujučy paśladoŭnym namahańniam dziaržavy zabiaśpiečvajecca ŭstojlivy ŭzrovień sacyjalnaj abaronienaści nasielnictva», — skazaŭ namieśnik ministra MZS. «Dastupnaja i efiektyŭnaja sistema achovy zdaroŭja — heta najvažniejšy pryjarytet dziaržaŭnaj palityki.
U Biełarusi kožny hramadzianin, ja padkreślivaju, kožny hramadzianin niezaležna ad uzroŭniu dabrabytu, svajho sacyjalnaha stanovišča maje mahčymaść biaspłatna atrymać luby vid miedyčnaj dapamohi, u tym liku samaj vysokatechnałahičnaj. Heta taja asablivaść, jakoj moža pachvalicca daloka nie kožnaja kraina navat u Jeŭropie», — skazaŭ jon.
Biełaruś maje adzin z samych nizkich pakazčykaŭ maciarynskaj, dziciačaj i moładzievaj śmiarotnaści ŭ śviecie i ŭvachodzić u lik 25 najlepšych krain dla maciarynstva.
«Hetyja pakazčyki mahli b być jašče bolš vysokimi, kali b nie adnabakovyja prymusovyja zachady, uviedzienyja valuntarysckim čynam šeraham zachodnich krain u dačynieńni Biełarusi. Palityka sankcyjnaha cisku, jakuju prasoŭvajuć hetyja krainy, parušaje ekanamičnyja i sacyjalnyja pravy nie tolki biełaruskich hramadzian, ale i hramadzian mnohich inšych krain. Bo ŭviedzienaja, naprykład, zabarona na vykarystańnie pavietranaj prastory Biełarusi robić niebiaśpiečnaj hramadzianskuju avijacyju i sumnieŭnaj «zialonuju ŭhodu» Jeŭrapiejskaha sajuza. Zachadam zakrytaja bolšaść (a dzieści i ŭsie, naprykład Litvoj) naziemnych pamiežnych pierachodaŭ», — skazaŭ Ihar Siekreta. U vyniku takoha złoŭžyvańnia hieahrafičnym stanoviščam z boku zachodnich susiedziaŭ Biełarusi vidavočnyja humanitarnyja i ekanamičnyja straty, kanstatavaŭ jon.
Razam z tym Biełarusi ŭdałosia pieraaryjentavać svaju ekanomiku i vybudavać sistemu, jakaja zabiaśpiečvaje hramadzianam hodny ŭzrovień jakaści žyćcia. «U toj ža čas my zaklikajem ES viarnucca ŭ rečyšča dyjałohu i źniać usie niezakonnyja abmiežavańni, bo takim dziejańniam nie miesca ŭ sučasnym cyvilizavanym śviecie», — zajaviŭ namieśnik ministra MZS.
«Biełaruś maje namier i nadalej padtrymlivać vysokija standarty ŭ halinie pravoŭ čałavieka, nakiravanyja na sacyjalnuju abaronu, ekanamičnuju stabilnaść i palityčnaje adzinstva biełaruskich hramadzian», — zapeŭniŭ Ihar Siekreta.
Ciapier čytajuć
Chto tyja 17‑hadovy błohier i jaho 37‑hadovaja niaviesta, jakija šykoŭna žyli na hrošy sa zboru na chvoraje dzicia?25
Kamientary