U Biełarusi skardziacca na žachlivy deficyt kiroŭcaŭ. A jakija zarpłaty im prapanujuć?
Niadaŭna ŭ efiry STB prahučała, što niedachop šafioraŭ pryvodzić da trahiedyj na darohach. «Vyjazdžajuć pa doŭhi rubiel. U Biełarusi ŭ nas vielmi nizki ŭzrovień žyćcia. Nu i zarobak adpaviedna». Prapahandyst Kirył Kazakoŭ na heta zapiarečyŭ, što kiroŭcam u nas płaciać pa 4000 rubloŭ. A jak nasamreč?
Ahułam u dziaržaŭnym banku vakansij kala 10 tysiač prapanoŭ dla kiroŭcaŭ roznych katehoryj, što składaje amal 6% ad usich vakansij u krainie.
Tradycyjna samyja vysokija zarpłaty abiacajuć kiroŭcam-mižnarodnikam z katehoryjami SIE.
Samy vysoki zarobak, što možna ciapier znajści, — 5500 rubloŭ na miesiac (kala $1850), ale heta rabota pa Jeŭrasajuzie, bo treba mieć polskuju vizu D i pažadana — dośvied pracy pa Jeŭropie.
Maksimum, jaki prapanujuć kiroŭcam bieź vizy, — 4000‑5000 rubloŭ. Taki kiroŭca pavinien mieć katehoryju SIE i być hatovy vykonvać rejsy Biełaruś — Rasija.
Kiroŭcy, jakim nie treba jeździć u doŭhija zamiežnyja kamandziroŭki, mohuć raźličvać tolki na ścipłyja zarobki. Tak, naprykład, u Pieršamajskim departamiencie achovy MUS šukajuć kiroŭcaŭ katehoryj V i D. Abiacajuć 1300—1600 rubloŭ.
U «Minskenierha» šukajuć kiroŭcu hruzavika katehoryi S z zarpłataj 1500‑1850 rubloŭ.
Patrebny kiroŭcy i na zavod «Atłant». Tam abiacajuć ad 1200 da 2100 rubloŭ na miesiac.
Zarobki šafioraŭ katehoryi V
Minskaje adździaleńnie Biełaruskaj čyhunki kiroŭcu lehkavika hatova płacić 1094‑1642 rubli. Nacyjanalny akademičny arkiestr simfaničnaj i estradnaj muzyki — 1000‑1100 rubloŭ.
Na MAPIDzie kiroŭca lehkavoha aŭto možna atrymlivać 1750 rubloŭ.
Kiroŭcam na chutkaj u Minsku abiacajuć ad 1200 da 1600 rubloŭ, kali čałaviek biez dośviedu i maje tolki katehoryju V.
Zarobki kiroŭcaŭ aŭtobusaŭ i maršrutak u Biełarusi
Ecolines šukaje kiroŭcu z katehoryjami D/DE, jaki budzie vykonvać mižnarodnyja rejsy. Hatovy płacić ad 2200 da 3200 rubloŭ na ruki.
Kiroŭcu maršrutki ŭ Minsku abiacajuć 3500‑4500 rubloŭ na ruki.
Były maršrutčyk dzielicca, što zarobki sapraŭdy davoli vysokija. Kala 1000 dalaraŭ na haradskich maršrutkach zarablali i dziesiać hadoŭ tamu.
U niekatorych umovy pracy takija, što kiroŭca pavinien addać pracadaŭcu peŭnuju dzionnuju sumu, a ŭsio astatniaje — heta svoj zarobak. Maŭlaŭ, takim čynam adsutničaje matyvacyja padmanvać pracadaŭcu.
Ale pracavać na haradskoj maršrutcy składana. Na mižharodnych rejsach nahruzka mienšaja, ale trapić tudy ciažej.
Pa słovach byłoha maršrutčyka, asabliva dobra pracavać na maršrutach, dzie ludzi adpraŭlajuć šmat pieradač. Tady kiroŭcy zarablajuć hodnyja hrošy, dyj jeździć pa trasie našmat pryjemniej, čym uvieś dzień krucicca ŭ horadzie.
Kolki zarablajuć šafiory ŭ rehijonach Biełarusi
Kiroŭcu aŭtobusa ŭ Viciebskabłaŭtatransie abiacajuć ad 2110 rubloŭ na ruki. U Homielabłaŭtatransie — ad 2100 da 4500 na ruki.
Homielskaje abłasnoje spažyŭtavarystva šukaje piersanalnaha kiroŭcu katehoryi V na zarpłatu ad 1300 rubloŭ čystymi. Hrafik — vaśmihadzinny 5/2.
U Breście kiroŭcu-kurjeru biez ułasnaha aŭto prapanujuć kala 1300 rubloŭ na ruki.
Mužčyna, jaki šukaje pracu ŭ adnym z abłasnych centraŭ i maje katehoryi V i S, kaža, što pad katehoryju V maksimum, na jaki možna raźličvać u jahonym horadzie, — heta 1300‑1400 rubloŭ čystymi. Ale znajści pracu ŭsio adno niaprosta.
U adnym miescy mužčynu nie ŭziali praz uzrost (jamu chutka spoŭnicca 60), u inšym — praz toje, što ŭ jaho nibyta šmat štrafaŭ pa linii DAI, a ŭ trecim skazali, što z kartaj palaka ŭ ich nie biaruć (heta była dziaržaŭnaja ŭstanova).
Što tyčycca hruzavoj katehoryi, to mužčyna sprabavaŭ pracavać, ale za miesiac ź pierapracoŭkami, načnymi źmienami i źmienami ŭ vychodnyja maksimum, jaki jon mieŭ, — heta 2000‑2200 rubloŭ. A kali nie pierapracoŭvać, to budzie kala 1500.
Kolki možna zarabić u taksi?
U stalicy taksisty, jakija hatovyja šmat pracavać, mohuć mieć 2500‑3000 rubloŭ na ruki. U abłasnych haradach zarablajuć mienš — 2000‑2200 rubloŭ.
Admietna, što vyrašać prablemu ź niedachopam kiroŭcaŭ namahajucca ŭ tym liku pryciahvajučy zamiežnikaŭ. Kiroŭcy aŭtamabilaŭ z 1 lipienia 2023 hoda ŭvajšli ŭ śpis prafiesij, pa jakich rabotnikaŭ-zamiežnikaŭ prymajuć na pracu ŭ sproščanym paradku. Sproščany paradak praciahnie dziejničać i ŭ 2026 hodzie.
Siarod taksistaŭ ciapier, naprykład, usio bolš kiroŭcaŭ z Turkmienistana i Kyrhyzstana.
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary