U Minsku źjaviłasia vulica kadebešnika Fiedasiuka, jaki zahinuŭ u pierastrełcy z Andrejem Zielcaram
Na terytoryi minskaha žyłoha kompleksu «Paŭnočny bierah» źjaviłasia vulica, nazvanaja imiem supracoŭnika KDB Dźmitryja Fiedasiuka, jaki zahinuŭ u pierastrełcy z Andrejem Zielcaram. Źviestki publičnaj kadastravaj karty zaŭvažyła «Lusterka».
Adrezak praciahłaściu kala dvuch kiłamietraŭ, jaki raniej pavodle dakumientaŭ značyŭsia jak «prajektavanaja vulica №35», atrymaŭ imia «Staršaha lejtenanta Dźmitryja Fiedasiuka». Kali da inšych vulicach možna znajści karotkaje apisańnie, čym viadomy čałaviek, čyim imiem nazvanaja vulica, to nakont hetaj infarmacyi ŭ publičnaj kadastravaj karcie pakul niama.
Rašeńnie ab prysvajeńni vulicy imia «Staršaha lejtenanta Dźmitryja Fiedasiuka» było zaćvierdžanaje Minskim haradskim Savietam deputataŭ.
Dźmitryj Fiedasiuk z pazyŭnym «Nirvana» — 31‑hadovy bajec śpiecyjalnaha padraździaleńnia «Alfa» KDB, zahinuŭ 28 vieraśnia 2021 hoda padčas pierastrełki ŭ kvatery Andreja Zielcara na vuł. Jakuboŭskaha ŭ Minsku.
Žonku Zielcara Maryju Uśpienskuju zatrymali, abvinavacili ŭ saŭdziele ŭ zabojstvie i paźniej nakiravali na prymusovaje lačeńnie ŭ psichijatryčny stacyjanar. Hienprakuratura pryznała dziejańni supracoŭnikaŭ KDB zakonnymi.
Paśla trahiedyi pa krainie prajšła chvala zatrymańniaŭ tych, chto, na dumku ŭładaŭ, niapravilna vykazvaŭsia pra hetuju situacyju ŭ sacyjalnych sietkach. Suprać ich zavodzili kryminalnyja spravy pavodle art. 130 (raspalvańnie sacyjalnaj varožaści) i art. 369 (abraza pradstaŭnika ŭłady).
Ciapier čytajuć
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary