Kanapackaja zaklikała pakarać Jarmošynu za falsifikacyju vybaraŭ 2020 hoda
«Narod pavinien viedać praŭdu!» Hanna Kanapackaja niečakana abvinavaciła byłuju kiraŭnicu CVK Lidziju Jarmošynu ŭ falsifikacyi prezidenckich vybaraŭ 2020 hoda. Praŭda, jość niuans.
«Vielmi mnie ŭsio ž taki chočacca razabracca, a rabić heta nieabchodna ŭžo siońnia ŭ intaresach budučaj demakratyčnaj Biełarusi, jakim takim čaroŭnym čynam tahačasnaja kiraŭnica CVK RB zapałała luboŭju da mikaševickaj prajdziśvietki i z surjoznymi parušeńniami zakanadaŭstva RB u znakavym 2020 hodzie spačatku zarehistravała jaje inicyjatyŭnuju hrupu, zatym, z takimi ž parušeńniami, jaje samu — kandydatam u prezidenty, a paśla — nie davała nikomu adkryć rota na supraćzakonny «čos pa Biełarusi» trojcy ašalełych ad biespakaranaści samazvanak-ekstremistak na etapie ahitacyi i hałasavańnia», — piša Kanapackaja.
«Chopić zajmacca zakulisnymi hulniami, narod pavinien viedać praŭdu!» — dadaje jana.
Kanapackaja abiacaje arhanizavać u najbližejšy čas «praces pa delehitymizacyi Cichanoŭskaj jak niezakonna zarehistravanaha kandydata na prezidenckich vybarach u Biełarusi ŭ 2020 hodzie z nastupnym patrabavańniem va ŭstanoŭlenym paradku ŭnieści ŭ ich vyniki źmieny z pryciahnieńniem vinavatych asob da praduhledžanaj Zakonam adkaznaści».
Spačatku jana abiacaje pajści ŭ Hienprakuraturu, a potym u Viarchoŭny sud «ź iskam pa anulavańni rehistracyi Cichanoŭskaj i jaje 10% vyniku na vybarach 2020 hoda».
«Nie dajuć źbiehłyja samazvancy pieraviarnuć staronku, jak prapanuje im dziejnaja ŭłada, pasiniełymi palcami čaplajucca za reštki svajho «ŭmoŭna lehitymnaha» statusu 2020 hoda. Nu što ž, tady daviadziecca hetuju staronku pierapisać i adredahavać», — napisała Kanapackaja.
Kamientary