Turecki łaŭreat premii Čečki byŭ u zachapleńni ad Biełarusi i režymu ŭ joj. A paśla trapiŭ na Akreścina

Akaj Deprem — hramadzianin Turcyi i Rasii. Jon padtrymlivaŭ dziejańni Rasii na Danbasie i niekalki hadoŭ žyŭ u Daniecku. Z 2023 hoda jon staŭ častym hościem biełaruskich prapahandysckich kanałaŭ i navat atrymaŭ ad biełaruskich uładaŭ premiju imia Emila Čečki. U Biełarusi Deprem nieadnarazova zajaŭlaŭ, što kraina ŭražvaje jaho paradkam i biaśpiekaj, a kiepskaha ŭ joj jon ničoha nie zaŭvažaje.

Ale ŭ vieraśni 2025 hoda, kali Deprem čarhovy raz pryjechaŭ u Minsk, situacyja radykalna źmianiłasia — prytym sam jon nie moža zrazumieć čamu. U dzień pryjezdu ŭ jahonuju kvateru zajšli ludzi ŭ cyvilnym, zatrymali biez tłumačeńnia pryčyn, pavodzili siabie ahresiŭna i navat abražali Turcyju i turkaŭ. U RUUS Akaja Deprema try hadziny trymali ŭ kajdankach i, pavodle jaho słoŭ, naśmichalisia dy sprabavali źbić. Paśla hetaha jaho ŭsio ž adpuścili, ale zabrali dakumienty i telefon.

Deprem pasprabavaŭ abskardzić dziejańni milicyjantaŭ, ale zamiest adkazu jaho zabrali ŭ Departamient pa hramadzianstvie i mihracyi, dzie zajavili, što jon nibyta znachodzicca ŭ Biełarusi nielehalna i na jaho ŭžo šmat hadoŭ dziejničaje zabarona na ŭjezd. U vyniku turka źmiaścili pad vartu i adpravili na Akreścina.

Pavodle słoŭ Deprema, umovy tam byli vielmi drennyja: pierapoŭnienyja kamiery, adsutnaść duša, brudnyja matracy, pastajannaje śviatło, kłapy, adsutnaść advakataŭ i suviazi z rodnymi. Ježa była nizkaj jakaści, nie ŭličvalisia relihijnyja abmiežavańni. Niekatoryja zatrymanyja, ź jakimi jon siadzieŭ, znachodzilisia tam miesiacami, a adzin turkmien — amal hod biez suda.

Žurnalist adznačaje, što staŭ śviedkam źbićcia žančyn i žorstkaha abychodžańnia ź inšymi zatrymanymi. Jon pryznaŭsia, što jaho papiarednija pazityŭnyja ŭražańni pra Biełaruś paśla hetaha krychu raźviejalisia.

Praz 10 dzion jaho prymusili nabyć bilet na samalot i departavali ŭ Maskvu, prymusiŭšy pierad tym apłacić utrymańnie na Akreścina. Pasolstva Turcyi ŭmiašałasia tolki pad kaniec znachodžańnia žurnalista pad vartaj.

Paźniej Akaj Deprem daviedaŭsia, što MUS nie znajšło «dokazaŭ» niepravamiernych dziejańniach milicyi, na jakija jon skardziŭsia. Ciapier jon znachodzicca ŭ Turcyi i kaža: 

«Paśla ŭsiaho taho, što adbyłosia, i reakcyj mnohich žurnalistaŭ dy ŚMI ŭ Rasii ja trochi astyŭ da tych miescaŭ, dzie ja žyŭ šmat hadoŭ. Ščyra kažučy, mnie treba krychu pryjści ŭ siabie».

• 8
• 0
• 104
• 12
• 2
• 1
• 1
• 0