U Minsku zakryli vulicu Masiukoŭščyna adrazu ažno na piać hadoŭ. Što tam adbyvajecca?
Vulica Masiukoŭščyna zastajecca častkova pierakrytaj z 2011 hoda, a abiacany dublor daŭžynioj mienš za kiłamietr tak i nie pabudavali. Ciapier bolš za 50 damoŭ mohuć akazacca zabłakavanymi z abodvuch bakoŭ: pobač pačniecca budaŭnictva bujnoj raźviazki.
Ruch na ŭčastku vulicy Masiukoŭščyna ad vulicy Michasia Łyńkova da vulicy Kaleśnikava budzie zakryty da 17 listapada 2030 hoda. Pra heta havorycca ŭ śviežym rašeńni Minharvykankama.
Heta aznačaje, što žychary damoŭ 34—88 na hetym adrezku, a taksama damoŭ na Ždanovickaj vulicy, jakaja prymykaje da pierakrytaha ŭčastka, mohuć zastacca biez anijakaj mahčymaści padjezdu da svaich učastkaŭ. Vulica zacisnutaja pamiž čyhunačnymi puciami i haražnym masivam, i inšych vyjezdaŭ ź jaje prosta niama.
U dakumiencie nie tłumačycca, jak pry poŭnaj zabaronie ruchu buduć arhanizavanyja prajezd chutkaj dapamohi, pažarnaj abo kamunalnaj techniki, jakoj u chutkim časie treba budzie rasčyščać śnieh — nijakich vyklučeńniaŭ u tekście nie prapisana.
Jak Masiukoŭščyna stała prablemnaj
Vulica Masiukoŭščyna źjaviłasia ŭ Minsku paśla ŭklučeńnia adnajmiennaj vioski ŭ miežy horada ŭ 2004 hodzie. Da taho času jana nazyvałasia Centralnaj.
Vulica była asnoŭnym vyjezdam z žyłoha rajona Masiukoŭščyna na MKAD. Situacyja pahoršyłasia, kali ŭ kancy 2000‑ch — pačatku 2010‑ch hadoŭ vulicu Cimirazieva zakryvali na rekanstrukcyju.
Dadałosia i toje, što ŭ 2010‑ia hady pačałosia aktyŭnaje budaŭnictva Kamiennaj Horki. Centralnaja vulica byłoj vioski stała tranzitnaj suviaźziu pamiž starym i novym žyłymi rajonami na zachadzie horada. Pobač taksama źjaviłasia vialikaja parkoŭka kala prachodu pad čyhunkaj da rynku Ždanovičy, što pryciahnuła jašče bolš aŭtamabilaŭ.
Vuzkaja viaskovaja vulica nie była raźličanaja na taki trafik, jaki parušaŭ kamfort i biaśpieku jaje žycharoŭ. Ludzi hadami źviartalisia ŭ DAI, administracyju rajona i Minharvykankam z prośbaj pierakryć tranzit, padkreślivajučy, što nie zroblenyja tratuary i niama biaśpiečnych umoŭ dla ruchu piešachodaŭ.
Pastaŭlenyja darožnyja znaki, jakija zabaraniali tranzitny ruch, lažačyja palicejskija i rejdy DAI nie dapamahali. U 2011 hodzie ruch upieršyniu pierakryli fizična — na ŭjeździe z boku vulicy Łyńkova pastavili bietonnyja błoki.
Heta častkova pamienšyła patok mašyn, choć ruch zastavaŭsia aktyŭnym, a bližej da vulicy Kaleśnikava vulica nahadvała stychijnuju parkoŭku dla naviedvalnikaŭ rynku, jakija nie chacieli płacić za miesca na płatnaj parkoŭcy.
Abiacanaja vulica-dublor
U 2012 hodzie ŭłady pryniali rašeńnie pabudavać vulicu-dublor uzdoŭž čyhunki, jakaja b abyšła siadzibnuju zabudovu i złučyła vulicu Łyńkova z vulicaj Kaleśnikava, a dalej — praciahnułasia da MKAD.
Daŭžynia novaj vulicy-dublora była mienšaj za 900 mietraŭ — ale srodkaŭ na jaje tak i nie znajšłosia.
Płanavałasia, što vulicu-dublor adkryjuć da 2018 hoda razam z puciepravodam cieraz čyhunku, jaki b źviazaŭ Kamiennuju Horku ź Lebiadzinym. Adnak budaŭnictva navat nie pačynałasia.
Bietonnyja błoki z boku Łyńkova sapraŭdy prybrali, ale ŭ 2020 hodzie ruch znoŭ abmiežavali — na piać hadoŭ, «u suviazi z pahrozaj biaśpiecy darožnaha ruchu, u tym liku žyćciu i zdaroŭju hramadzian». Termin hetaha rašeńnia i skončyŭsia ciapier.
Raźviazka i puciepravod nad čyhunkaj
Paśla zakančeńnia dziejańnia abmiežavańnia paŭstała pytańnie: ci adkryvać vulicu. Ale Minharvykankam pryniaŭ novaje rašeńnie — zamiest raniejšaha abmiežavańnia ruchu była ŭviedziena zabarona na piać hadoŭ.
Adnoj z pryčyn moža być toje, što ŭ 2025 hodzie narešcie pačałosia prajektavańnie puciepravoda, jaki maje źviazać Ratamskuju vulicu z vulicaj Kaleśnikava. Pačatak budaŭnictva płanujecca ŭ 2026 hodzie.
Adnak, zhodna z prajektam detalovaj płaniroŭki 2022 hoda, novaja raźviazka nie tolki nie vyrašaje prablemy žycharoŭ vulicy Masiukoŭščyna, ale moža zrabić jaje bolš vostraj. U prajekcie niama abiacanaha dublora ŭzdoŭž čyhunki: blizkaść viaskovych mohiłak robić jaho prakładku niemahčymaj.
Zamiest hetaha vulicu, jakaja adychodzić ad vulicy Kaleśnikava, pabudujuć tak, što jana projdzie pierad mohiłkami, dla čaho płanujuć źnieści šerah damoŭ, i stvoryć T-padobnaje skryžavańnie z vulicaj Masiukoŭščyna. Jaje praciah praz haražny masiŭ paznačany tolki ŭ pierśpiektyvie — i moža zaciahnucca na dziesiacihodździ.
Praŭda, mahčyma, budzie realizavany inšy varyjant, tamu što ŭ prajekcie detalovaj płaniroŭki byŭ pakazany karotki čyhunačny puciepravod nad vulicami Kaleśnikava — Ratamskaj, adnak hetym letam hiendyrektar «Minskbuda» Alaksandr Cierachaŭ zajaviŭ, što tut źjavicca puciepravod daŭžynioj kala 400 mietraŭ.
Takaja vialikaja daŭžynia moža śviedčyć, što płanujecca nie čyhunačny, a aŭtamabilny puciepravod cieraz čyhunku: ad vulicy Cimirazieŭskaj da vulicy Masiukoŭščyny. U takim vypadku vyjezd z vulicy Masiukoŭščyna da vulicy Kaleśnikava moža być całkam pierakryty budaŭničaj placoŭkaj.
U takoj situacyi łahična było b adkryć prajezd z boku vulicy Łyńkova, bo kali jon zastajecca zakrytym, a vyjezd u bok Kaleśnikava moža być pierakryty budaŭnictvam, žychary vulicy Masiukoŭščyna ryzykujuć apynucca zabłakavanyja z dvuch bakoŭ.
«Naša Niva» — bastyjon biełaruščyny
PADTRYMAĆ
Kamientary