Rasija rezka pavialičyła zakupki biełaruskich naftapraduktaŭ na fonie deficytu paliva, jaki zachavajecca na rasijskim rynku. Pavodle infarmacyi Reuters sa spasyłkaj na krynicy ŭ halinie, u lipieni Biełaruś ustanaviła novy rekord pa čyhunačnych pastaŭkach bienzinu i dyzielnaha paliva ŭ Rasiju.
Za miesiac pastaŭki aŭtamabilnaha bienzinu ź biełaruskich naftapierapracoŭčych zavodaŭ vyraśli na 13% u paraŭnańni z červieniem i skłali kala 212 tysiač ton. Adhruzki dyzielnaha paliva pavialičylisia prykładna ŭdvaja — da 162 tysiač ton. Akramia taho, u Rasiju było pastaŭlena kala 13,1 tysiačy ton avijacyjnaj hazy suprać 16 tysiač ton miesiacam raniej.
Usiaho za studzień—lipień 2026 hoda pastaŭki bienzinu ź Biełarusi na rasijski rynak pavialičylisia ažno ŭ 25 razoŭ i dasiahnuli kala 665 tysiač ton. Abjom pastavak dyzielnaha paliva za hety ž pieryjad vyras u 6,5 raza — da 418 tysiač ton.
Adnoj z hałoŭnych pryčyn hetaha stała źnižeńnie ŭłasnaj vytvorčaści na rasijskich naftapierapracoŭčych zavodach paśla atak ŭkrainskich bieśpiłotnikaŭ. Da pačatku lipienia vypusk bienzinu ŭ Rasii skaraciŭsia prykładna da 65% ad siaredniaha ŭzroŭniu ŭnutranaha spažyvańnia, a vytvorčaść dyzielnaha paliva amal zraŭniałasia z patrebami ŭnutranaha rynku.
U suviazi z hetym rasijskija ŭłady zabaranili ekspart dyzielnaha paliva dla vytvorcaŭ, padoŭžyŭšy dziejańnie abmiežavańnia da 31 žniŭnia, a taksama zajavili pra namier arhanizavać impart matornaha paliva.
Biełaruś, jakaja maje dva naftapierapracoŭčyja zavody — u Navapołacku i Mazyry — z ahulnaj prajektnaj mahutnaściu kala 24 miljonaŭ ton nafty ŭ hod, raniej zajaŭlała pra hatoŭnaść častkova kampiensavać straty rasijskaj pierapracoŭki. Jašče vosieńniu minułaha hoda paviedamlałasia, što na biełaruskich NPZ pačali pierapracoŭvać rasijskuju davalnickuju naftu, a atrymanyja naftapradukty buduć pastaŭlacca jak na rasijski rynak, tak i na ekspart.
Ciapier čytajuć
Biełarusu na 100 hadoŭ zabaranili ŭjezd u Rasiju — za ŭdzieł u minskich maršach 2020 hoda3
Kamientary