Rubia pakinuŭ Ženievu, zajaviŭšy pra značny prahres u pieramovach z Ukrainaj
Dziaržsakratar zajaviŭ, što na pieramovach ab prapanavanym ZŠA płanie pa spynieńni vajny Rasii suprać Ukrainy dasiahnuty značny prahres. Źjaviŭsia abnoŭleny i dapracavany ramačny dakumient ab miry. Pieramovy buduć praciahnuty na hetym tydni.
Rubia dapuściŭ, što jany mohuć nie zaviaršycca da abaznačanaha prezidentam ZŠA Donaldam Trampam terminu ŭ čaćvier, piša Bi-bi-si
Rubia pakinuŭ Ženievu i viartajecca ŭ Vašynhton paśla sustreč na vysokim uzroŭni, pryśviečanych mirnamu płanu dla Ukrainy, paviedamlaje CNN sa spasyłkaj na vysokapastaŭlenaha pradstaŭnika Dziarždepartamienta ZŠA. «Jašče treba zrabić peŭnuju pracu», — zajaviŭ jon paśla sustrečy z ukrainskimi i jeŭrapiejskimi pieramoŭščykami.
Dziaržsakratar daŭ zrazumieć, što abmierkavańni na techničnym uzroŭni praciahnucca, vykazaŭšy aptymizm adnosna taho, što «my dasiahniom mety ŭ vielmi razumnyja terminy, vielmi chutka».
Niajasna, ci pakinuli Ženievu inšyja słužbovyja asoby ZŠA, choć raniej Rubia zajaŭlaŭ, što ŭ amierykanskaha boku «jość śpiecyjalisty samaha roznaha ŭzroŭniu, jakija pracujuć nad hetym na pastajannaj asnovie i całkam uciahnutyja ŭ heta», adznačaje CNN.
Pa zakančeńni pieramovaŭ u Ženievie ŭ niadzielu Rubia abviaściŭ pra vialiki prahres u ich. «My dabilisia značnaha prahresu i ruchajemsia da spraviadlivaha i tryvałaha miru», — skazaŭ jon. Pavodle jaho słoŭ, hetyja pieramovy, vierahodna, byli lepšymi z usich, što ZŠA viali z Ukrainaj z momantu viartańnia Trampa da ŭłady.
Kiraŭnik ofisa prezidenta Ukrainy Andrej Jarmak napisaŭ u telehramie: «Chaču paćvierdzić: my praviali vielmi praduktyŭnuju pieršuju sustreču z pavažanaj amierykanskaj delehacyjaj. Dasiahnuli vielmi dobraha prahresu i ruchajemsia napierad da spraviadlivaha i praciahłaha miru».
Pa vynikach pieramoŭ baki pryniali sumiesnuju zajavu. U joj skazana, što ŭ Ženievie pradstaŭniki ZŠA i Ukrainy padrychtavali «abnoŭleny i dapracavany ramačny dakumient ab miry».
Hetaja kancepcyja, vidać, źjaŭlajecca madyfikacyjaj płana, raspracavanaha administracyjaj Trampa, jaki Kijeŭ i jaho sajuźniki paličyli zanadta vyhadnym dla Maskvy, kamientuje Reuters. Nijakaj kankretyki adnosna 28 punktaŭ mirnaha płana, jakija praduhledžvajuć, u tym liku, terytaryjalnyja ŭstupki i abmiežavańni dla ŭkrainskaj armii, sumiesnaja zajava nie źmiaščaje. Ukrainskaja delehacyja ŭ zajavie padziakavała Trampu za «niastomnyja namahańni», nakiravanyja na zaviaršeńnie vajny. Baki damovilisia praciahnuć «pracu nad ahulnymi prapanovami» «ŭ najbližejšyja dni», padtrymlivajučy pry hetym kantakt ź jeŭrapiejskimi partniorami.
Bieły dom vypuściŭ taksama asobnuju zajavu, u jakoj paviedamiŭ, što abnoŭlenaja viersija mirnaha płanu ŭklučaje ŭzmacnieńnie harantyj biaśpieki dla Ukrainy, piša Reuters.
Jak skazana ŭ zajavie Biełaha doma, ukrainski bok ličyć, što biahučy prajekt mirnaha płana ŭžo «adlustroŭvaje intaresy nacyjanalnaj biaśpieki» — paśla taho, jak u jaho byli ŭniesienyja «dapaŭnieńni i ŭdakładnieńni».
Klučavyja pytańni, jakija vyklikali zaniepakojenaść Ukrainy, byli «ŭvažliva razhledžanyja», «siońniašni dzień aznamienavaŭ saboj značny krok napierad», śćviardžajuć u Biełym domie. Kijeŭ heta nie kamientavaŭ.
«Ukrainskaja delehacyja paćvierdziła, što ŭsie jaje asnoŭnyja pytańni — harantyi biaśpieki, doŭhaterminovaje ekanamičnaje raźvićcio, abarona infrastruktury, svaboda sudnachodstva i palityčny suvierenitet — byli ŭvažliva razhledžanyja padčas sustrečy», — havorycca ŭ zajavie.
Rubia skazaŭ žurnalistam, što jašče treba prapracavać šerah pytańniaŭ, uklučajučy rolu NATA, ale pry hetym jaho kamanda zvuziła koła niavyrašanych prablem, što datyčać mirnaha płanu z 28 punktaŭ, jaki prasoŭvajecca prezidentam Trampam.
Dziaržsakratar ZŠA vykazaŭ nadzieju, što pahadnieńnie budzie dasiahnutaje da čaćviarha, ale dapuściŭ, što heta moža zaniać i bolš času. Tramp nazyvaŭ čaćvier krajnim terminam.
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia6
Kamientary