Instruktar tłumačyć, jak mahła adbycca trahiedyja ź biełaruskaj, jakuju źniesła płyńniu pad Murmanskam
Za niekalki dzion da trahiedyi ź biełaruskaj padčas ajsfłoatynhu ŭ Murmansku płyńniu źniesła piaciarych turystaŭ z Kitaja i Indyi.
U Murmanskaj vobłaści Rasii praciahvajuć šukać 58‑hadovuju hramadzianku Biełarusi. Jana prapała 1 studzienia padčas hrupavoha ajsfłoatynhu u race Tułoma. Heta vid ekstremalnaha adpačynku, kali čałaviek płavaje ŭ ledzianoj vadzie ŭ śpiecyjalnym hidrakaściumie.
Śledčyja zaviali kryminalnuju spravu pavodle častki 1 artykuła 238 Kryminalnaha kodeksa Rasii — akazańnie pasłuh, jakija nie adpaviadajuć patrabavańniam biaśpieki žyćcia abo zdaroŭja spažyŭcoŭ.
Viadoma, što ajsfłoatynh pravodziŭ miascovy siertyfikavany hid. Pa śviedčańniach vidavočcaŭ, kali biełarusku stała znosić płyńniu, arhanizatary znachodzilisia na bierazie.
Śpiecyjalnyja hidrakaściumy dla ajsfłoatynhu mohuć trymać ciapło da 6 hadzin. Jany dobra trymajuć čałavieka na vadzie, ale płyć u ich niepadrychtavanamu čałavieku składana.
U sacsietkach pad navinoj pra źnikłuju biełarusku pakinuŭ kamientar adzin z arhanizataraŭ ajsfłoatynhu ŭ Murmansku, Pavieł Jermakoŭ. Jon adrazu adznačyŭ, što trahiedyja ź biełaruskaj zdaryłasia nie ŭ ich, ale patłumačyŭ, jak mahli raźvivacca padziei.
Pavieł spačatku apisvaje, jak ajsfłoatynh arhanizuje jaho kamanda. Jany pravodzić takija kupańni ŭ zakrytaj i aśvietlenaj buchcie Kolskaha zaliva, u jakoj praktyčna niama płyni. Kožnaja hrupa prachodzić abaviazkovy instruktaž, i adno z asnoŭnych pravił — nie vypłyvać z buchty ŭ zaliŭ.
«U Kolskim zalivie vielmi mocnyja pryliŭna-adliŭnyja płyni. Uzrovień vady źmianiajecca 4 razy na sutki i roźnica pamiž vialikaj i małoj vadoj moža dasiahać 3,5 mietra! Ujavicie, jakoj mocnaj moža być płyń».
U vadzie z hrupaj pavinien pastajanna znachodzicca instruktar, plus niekalki čałaviek dziažurać na pryčale.
«Usie našy supracoŭniki navučanyja dziejańniam u ekstrannych situacyjach (majuć paśviedčańni matrosa-vyratavalnika, prachodzili kursy pieršaj dapamohi, majuć dośvied dajvinha i frydajvinha ŭ arktyčnych vodach). Navat niahledziačy na toje, što my nikomu nie dazvalajem vypłyvać z buchty i ŭvieś čas za hetym sočym (dla tych, chto ihnaruje našy praviły, kupańnie skančajecca i jany iduć u śpiecyjalnaje ciopłaje pamiaškańnie hrecca i pić čaj), u nas na dziažurstvie jość sapy i matornaja łodka».
Dalej arhanizatar vykazaŭ svaju viersiju, što mahło pryvieści da trahiedyi.
«Kupańnie było arhanizavana na race Tułoma, jakaja ŭpadaje ŭ Kolski zaliŭ i maje mocnuju płyń, dadamo da hetaha mocnuju adliŭnuju płyń u zalivie (miarkujučy pa časie zdareńnia, jakraz byŭ adliŭ). Instruktara ŭ vadzie nie było (miarkujučy pa navinach), dy navat kali b i byŭ, moh by dahnać u mocnaj płyni tolki adnaho paciarpiełaha. Što b u hety čas rabili inšyja ŭdzielniki hrupy, niezrazumieła».
Jon zaŭvažaje, što, imavierna, nichto z udzielnikaŭ kupańnia nie byŭ pryviazany strachovačnym trosam, nie było matornaj łodki, na jakoj možna było b chutka dahnać i evakujavać paciarpiełuju ŭ ciopłaje pamiaškańnie.
«Situacyja ŭskładniłasia jašče i tym, što ciapier u Murmansku maroznaje nadvorje da -30, a tempieratura vady ŭ zalivie +2, z-za čaho nad zalivam staić husty ščylny tuman. Taksama na šyracie Murmanska praciahvajecca palarnaja noč, praktyčna zaŭsiody ciomna. Kantralavać u nieaśvietlenym miescy ŭ takich umovach dosyć składana, kali nie skazać niemahčyma».
Za niekalki dzion da trahiedyi ź biełaruskaj, 26 śniežnia, padčas ajsfłoatynhu ŭ Murmansku płyńniu źniesła piaciarych turystaŭ z Kitaja i Indyi. Ale ich paśpieli vyłavić i na nadzimanaj łodcy davieźci da bieraha.
Ciapier čytajuć
Syn Natalli Piatkievič z prydychańniem raskazaŭ, što znajšoŭ rabotu ŭ picierskaj firmie12
Kamientary