U noč na 8 lutaha była atakavana CEC «Łuč» u rasijskim Biełharadzie. Heta vyklikała błekaŭt. A pry sprobach padklučyć sietki pačalisia šmatlikija razryvy trub i paŭtornyja karotkija zamykańni. 80 tysiač žycharoŭ Biełharada zastalisia biez aciapleńnia.
Hubiernatar Biełharadskaj vobłaści Viačasłaŭ Hładkoŭ pryznaŭ, što adnavić enierhietyku ŭ rehijonie da kanca nie atrymlivajecca.
«Tyja dziejańni, jakija našy enierhietyki i ciepłaviki rabili apošnija dvoje sutak, pakul nie pryvodziać da doŭhačakanaha vyniku. My adnavili hazazabieśpiačeńnie, nam zastajecca padklučyć 500 spažyŭcoŭ pa elektrazabieśpiačeńnia ŭ damach, my vyrašyli prablemy z padačaj chałodnaj vady i vodaadviadzieńniem, ale ŭ nas jość prablema pa aciapleńnia», — piša jon u telehram-kanale.
Z-za hetaha ŭ 455 šmatkvaternych damach, 25 dziciačych sadkach, 17 škołach, 9 paliklinikach i 4 VNU pačali źlivać vadu ź sistemy aciapleńnia.
«Adnaŭlenčyja raboty, jak ja ŭžo skazaŭ, praciahvajucca. Pa miery ich vykanańnia, kali my ŭbačym, što naša CEC budzie hatovaja da padačy ciapła, my budziem zapaŭniać sistemu aciapleńnia i padavać ciepłanośbit u žyłyja damy, u sacyjalnyja abjekty, u kamiercyjnyja pradpryjemstvy. Kali my hetaha nie zrobim, uron ci škoda budzie praktyčna katastrafičnaj dla kožnaha žychara, jaki žyvie ŭ hetaj častcy horada», — piša Hładkoŭ.
Punkty abahrevu ŭ vobłaści pieraviali na kruhłasutačny režym pracy. Pačali evakuacyju dziaciej u inšyja rehijony.
«Darahija siabry, kali vy hatovyja pakinuć dziaciej nam, to my biarom na siabie adkaznaść za ich znachodžańnie — vam treba patelefanavać u administracyju horada Biełharada ci svajoj zahadčycy dziciačaha sadka, kudy vy chodzicie, pakinuć svaje kantakty, i my hetuju pracu ŭžo pačniem vykonvać ź siońniašniaha dnia. Kali ŭ vas dzieci školnaha ŭzrostu: vy pakidajecie, jak i ŭ 2024—2025 hadach, svaje zajaŭki ŭ administracyi horada Biełharada, i my adpraŭlajem dziaciej u inšyja rehijony — u tyja miescy, jakija ŭžo zvykłyja, jak, naprykład, Respublika Krym, i ŭ bližejšyja rehijony — z hubiernatarami zaraz prahavorvajem», — paviedamiŭ Hładkoŭ.
Kamientary