У ноч на 8 лютага была атакавана ЦЭЦ «Луч» у расійскім Белгарадзе. Гэта выклікала блэкаўт. А пры спробах падключыць сеткі пачаліся шматлікія разрывы труб і паўторныя кароткія замыканні. 80 тысяч жыхароў Белгарада засталіся без ацяплення.
Губернатар Белгарадскай вобласці Вячаслаў Гладкоў прызнаў, што аднавіць энергетыку ў рэгіёне да канца не атрымліваецца.
«Тыя дзеянні, якія нашы энергетыкі і цеплавікі рабілі апошнія двое сутак, пакуль не прыводзяць да доўгачаканага выніку. Мы аднавілі газазабеспячэнне, нам застаецца падключыць 500 спажыўцоў па электразабеспячэння ў дамах, мы вырашылі праблемы з падачай халоднай вады і водаадвядзеннем, але ў нас ёсць праблема па ацяплення», — піша ён у тэлеграм-канале.
З-за гэтага ў 455 шматкватэрных дамах, 25 дзіцячых садках, 17 школах, 9 паліклініках і 4 ВНУ пачалі зліваць ваду з сістэмы ацяплення.
«Аднаўленчыя работы, як я ўжо сказаў, працягваюцца. Па меры іх выканання, калі мы ўбачым, што наша ЦЭЦ будзе гатовая да падачы цяпла, мы будзем запаўняць сістэму ацяплення і падаваць цепланосьбіт у жылыя дамы, у сацыяльныя аб’екты, у камерцыйныя прадпрыемствы. Калі мы гэтага не зробім, урон ці шкода будзе практычна катастрафічнай для кожнага жыхара, які жыве ў гэтай частцы горада», — піша Гладкоў.
Пункты абагрэву ў вобласці перавялі на кругласутачны рэжым працы. Пачалі эвакуацыю дзяцей у іншыя рэгіёны.
«Дарагія сябры, калі вы гатовыя пакінуць дзяцей нам, то мы бяром на сябе адказнасць за іх знаходжанне — вам трэба патэлефанаваць у адміністрацыю горада Белгарада ці сваёй загадчыцы дзіцячага садка, куды вы ходзіце, пакінуць свае кантакты, і мы гэтую працу ўжо пачнем выконваць з сённяшняга дня. Калі ў вас дзеці школьнага ўзросту: вы пакідаеце, як і ў 2024—2025 гадах, свае заяўкі ў адміністрацыі горада Белгарада, і мы адпраўляем дзяцей у іншыя рэгіёны — у тыя месцы, якія ўжо звыклыя, як, напрыклад, Рэспубліка Крым, і ў бліжэйшыя рэгіёны — з губернатарамі зараз прагаворваем», — паведаміў Гладкоў.
Цяпер чытаюць
Памятаеце Таццяну Зарэцкую, якая са скандалам звальнялася з Кабінета Ціханоўскай? У Эстоніі яе падазраюць у махлярстве36
Каментары