«Chaču być takoj ža ŭ staraści!» 87‑hadovaja piensijanierka skaryła sacsietki svajoj formaj
«Heta što za koška, tyhryca, pantera ŭ čyrvonym kaściumie?» — adzin z samych papularnych kamientaryjaŭ u Threads pad fota, na jakich 87‑hadovaja Kaciaryna Makarevič robić zaradku. Karystalniki zachaplajucca jaje fizičnaj formaj i hnutkaściu, a niechta navat vyrašyŭ, što biez štučnaha intelektu tut nie abyšłosia, piša Smartpress.
Hetaj zimoj Kaciaryna Parfionaŭna žyvie ŭ Minsku — dzieci zabrali jaje z ahraharadka Dražna (Staradarožski rajon) da siabie pieračakać marazy.
Usio žyćcio jana prapracavała ŭ Minsku vychavalnicaj u dziciačym sadku, viała biełaruskamoŭnyja hrupy.
Paśla vychadu na piensiju Kaciaryna Parfionaŭna viarnułasia ŭ rodnaje Dražna dahladać mamu, a paśla i prykipieła da vioski.
«Ja nikoli na dyjetach nie siadzieła, ale zaŭsiody była strojnaj. Ja ž jašče hady try tamu karoŭku trymała! Viedajecie, jakaja ŭ mianie haspadarka była: śvińni, husi. Ź imi nie rassłabišsia. Zaraz zastalisia tolki kurački, dy i tych na zimoŭku susiedcy addała, a sama z koškaj Musiaj — u stalicu».
Ciapier piensijanierka štoranicu robić zaradku.
«Ja kožnuju ranicu 10‑15 chvilin raźminaju svajo cieła — mnie heta patrebna jak pavietra. Kali nie paruchajusia, adčuvaju siabie drenna».
Praktykavańni Kaciaryny Parfionaŭny takija: lohkaja chada-bieh, nachiły napierad z dotykam padłohi, kručeńnie tułava, raźviadzieńnie ruk u baki. Piensijanierka zaŭvažaje, što za adzin padychod moža 30 «vuhałkoŭ» nahami zrabić (padjom noh ležačy na śpinie).
Žančynie začytali niekalki papularnych kamientaryjaŭ pad jaje fota z zaradkaj: «Aściarožniej z takimi fota, a to piensijny ŭzrost padymuć!», «Ja ŭ svaje 22 nie mahu ŭstać z łožka, a jana ŭ 87 vuń jak skača!», «Chaču być takoj ža ŭ staraści!».
«Heta ŭsio pra mianie? — biantežycca žančyna. — Pryjemna. Heta [unučka] Daška zakinuła ŭ internet maje fotakartki, a ludziam spadabałasia. Adnojčy sprabavała na hałavu kala ściany ŭstać. Usio vyvučyła, kab biaśpiečna było. Ale syn nie dazvoliŭ (śmiajecca)».
«Viedaju, što adno z maich praktykavańniaŭ, akazvajecca, jak raz z hetaj samaj johi. «Poza ščaślivaha dziciaci» nazyvajecca. Heta Dašy tak u internecie napisali. A ja i nie suprać, bo čas ad času ja i sapraŭdy jak toje dzicia: radujusia prostamu i ŭśmichajusia novamu dniu».
Pobač z Łukašenkam na chakiei źjaviłasia novaja pryhažunia10
Kamientary
Chiba maju ŭsio šancy być jak heta babka, kali babarykancy nie zabjuć (abiacali)