Byłaja palitźniavolenaja Natalla Padleŭskaja, vysłanaja z Polščy, atrymała prytułak u Litvie
Natalla prasiła mižnarodnuju abaronu ŭ Polščy, dzie žyvuć jejnyja svajaki.
Byłaja palitźniavolenaja Natalla Padleŭskaja raspaviała «Biełsatu», što 27 krasavika daviedałasia ab atrymańni prytułku i dazvołu na žycharstva ŭ Litvie, kudy Polšča pieradała biełarusku ŭvosień 2025 hoda ŭ ramkach Dublinskaha pahadnieńnia.
Natalla padała prašeńnie ab mižnarodnaj abaronie ŭ Litvie na pačatku listapada 2025 hoda — heta było nieabchodna zrabić, kab lehalna znachodzicca ŭ krainie. Naprykancy krasavika 2026 hoda zajava była ŭchvalenaja, i biełaruska atrymała prytułak.
«Dzialusia z vami cudoŭnaj navinoj: mnie dali prytułak i doŭhaterminovy vid na žycharstva. Praz tydzień ja atrymaju kartu i mnie viernuć moj pašpart. Dziakuj usim, chto mnie dapamahaŭ i byŭ vakoł mianie ŭ hetyja niaprostyja miesiacy», — skazała Natalla ŭ kamientary «Biełsatu».
Byłaja palitźniavolenaja ŭściešanaja hetym rašeńniem Litvy, adnak chacieła b usio ž mieć mahčymaść viarnucca ŭ Polšču.
Natalla Padleŭskaja prasiła mižnarodnuju abaronu ŭ Polščy, dzie žyvuć jejnyja svajaki. Adnak, pakolki žančyna ŭjechała ŭ Polšču ź litoŭskaj vizaj, da jaje prymianili Dublinski rehłamient, jaki daje prava krainie Jeŭraźviazu pieradavać prasiciela ŭ tuju dziaržavu, jakaja vydała vizu ci była pieršaj krainaj ujezdu.
Natalla abskardziła rašeńnie ab pieradačy jaje ŭ Litvu, adnak jašče da sudovaha pasiedžańnia ŭ hetaj spravie polskija pamiežniki 23 kastryčnika vyvieźli biełarusku ŭ Litvu.
Byłaja palitźniavolenaja raspaviadała, što jaje pieravozili ŭ kajdankach, jak złačyncu.
Natalli nie dali paprysutničać na sudzie ŭ spravie jejnaj skarhi na pastanovu ab pieradačy ŭ Litvu, jaki adbyŭsia 24 kastryčnika. Vajavodski administratyŭny sud u Varšavie admianiŭ pastanovu i vyrašyŭ, što prašeńnie biełaruski ab mižnarodnaj abaronie pavinna być nanoŭ razhledžanaje ŭ Polščy. Adnak Padleŭskaja na toj momant była ŭžo ŭ Litvie.
Paśla taho, jak rašeńnie vajavodskaha sudu pa kiejsie Natalli nabyło moc, polskaje Upraŭleńnie ŭ spravach zamiežnikaŭ musiła nanoŭ razhledzieć zajavu biełaruski ab mižnarodnaj abaronie. Adnak, sa słovaŭ byłoj palitźniavolenaj, jana dahetul nie atrymała ad polskaha boku nijakaj infarmacyi. Žančyna niepakoicca, što ciapier, paśla taho jak Litva dała joj prytułak, Polšča aŭtamatyčna admović.
Natalla Padleŭskaja była zatrymanaja ŭ Biełarusi 3 listapada 2021 hoda. Jaje abvinavacili ŭ źniavazie pradstaŭnika ŭłady (art. 369 Kryminalnaha kodeksu Biełarusi) i ŭ źniavazie Alaksandra Łukašenki (art. 368 Kryminalnaha kodeksu Biełarusi) dy asudzili da 1 hoda pazbaŭleńnia voli ŭ kałonii va ŭmovach ahulnaha režymu i štrafu 100 bazavych vieličyniaŭ.
4 lipienia 2022 hoda Natalla vyjšła na volu pa zakančeńni terminu. Praź niekatory čas na žančynu znoŭ pačaŭsia cisk, i jana pryniała rašeńnie pakinuć Biełaruś. Jaje evakujavali ŭ Litvu, jakaja stała pieršaj krainaj Jeŭraźviazu, što vydała joj vizu.
Ciapier čytajuć
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»12
Kamientary