Vulicu Mielnikajcie ŭ Minsku pierakryjuć na dva hady: treba dastać «Alesiu» i «Maryju»
Centr Minska čakaje čarhovaje transpartnaje vyprabavańnie. U pačatku červienia skrazny prajezd pa vulicy Mielnikajcie budzie całkam zakryty na niekalki hadoŭ, kab zavieršyć złučeńnie tunelaŭ treciaj linii i dastać tuneleprachodčyja kompleksy.
Jak paviedamlaje ahienctva «Minsk-Naviny» z vyjaznoj narady staršyni Minharvykankama Uładzimira Kucharava, pierakryćcio nieabchodnaje dla demantažu dvuch tuneleprachodčych kompleksaŭ i budaŭnictva złučalnaha vuzła ź dziejučaj linijaj mietro. Skrazny ruch pa Mielnikajcie spyniać prykładna na dva hady, pakinuŭšy miascovym žycharam tolki zajezdy ŭ dvary.
Vierahodna, havorka idzie tolki pra ŭčastak ad budynka administracyi Centralnaha rajona da miesca skryžavańnia vulicy Mielnikajte z praśpiektam Pieramožcaŭ, dzie raniej dumali budavać stancyju «Prafsajuznaja», bo pad astatniaj častkaj vulicy mietratuneli z abarotnymi tupikami byli prakładzieny jašče ŭ čas budaŭnictva pieršaj čarhi Zielenałužskaj linii.
Pra pierakryćcio ruchu pa vulicach Zasłaŭskaj i Dzimitrava, jakija prymykajuć da vulicy Mielnikajcie na hetym učastku, ničoha nie paviedamlajecca.
Nahadajem, što stancyju «Prafsajuznuju» vyklučyli z płanaŭ budaŭnictva Zialonałužskaj linii ŭ žniŭni minułaha hoda, tady ŭłady patłumačyli hetaje rašeńnie nizkim čakanym pasažyrapatokam i blizkaściu susiednich stancyj «Niamiha» i «Frunzienskaja», jakija tearetyčna zdolnyja samastojna spravicca z nahruzkaj.
Zaraz tuneleprachodčy kompleks «Alesia», jaki pačaŭ uzvodzić levy pierahonny tunel treciaj linii ŭ červieni 2025 hoda, znachodzicca na skryžavańni vulicy Maksima Bahdanoviča i praśpiekta Mašerava. Zaviaršajecca jaho techničnaje absłuhoŭvańnie, paśla čaho «Alesia» znoŭ vierniecca da pracy.
Paralelna da pracy rychtujecca novy kitajski kompleks ź imiem «Maryja». Jaho mantaž zakančvajecca ŭ katłavanie na Bahdanoviča, i ŭ kancy maja jon pačnie kapać druhi tunel u napramku «Jubilejnaj płoščy». Mienavita dla demantažu hetych dźviuch mašyn z-pad ziamli i stykoŭki novych tunelaŭ sa starymi spatrebiłasia zakryćcio vulicy ŭ centry stalicy.
«Naša Niva» — bastyjon biełaruščyny
Taćciana Zamiroŭskaja pieršy raz za 11 hadoŭ viarnułasia z ZŠA ŭ Jeŭropu. Mnohija maniery, zvyčki i navat ptuški, jakich my nie prykmiačajem, vyklikali ŭ jaje buru ŭspaminaŭ33
Kamientary