Załužny: Ukraina nikoli nie budzie ŭ NATA

Były hałoŭnakamandujučy USU i pasoł Ukrainy ŭ Vialikabrytanii hienierał Valeryj Załužny skieptyčna vykazaŭsia nakont pierśpiektyŭ ustupleńnia Ukrainy ŭ NATA i nazvaŭ alternatyvaj dla Kijeva dałučeńnie da inšych abaronnych sajuzaŭ, jakija ciapier farmirujucca. Takija zajavy jon zrabiŭ padčas ahulnaj narady pasłoŭ Ukrainy, jakaja adbyłasia ŭ Kijevie ŭ paniadziełak, piša «Ukrainskaja praŭda».

Padčas abmierkavańnia temy jeŭraatłantyčnaj intehracyi Ukrainy Załužnaha paprasili prakamientavać pytańnie partniorstva Kijeva z Abjadnanymi ekśpiedycyjnymi siłami (Joint Expeditionary Force, JEF) — kaalicyjaj, stvoranaj dziesiaćciu dziaržavami Paŭnočnaj Jeŭropy dla biaśpieki ŭ rehijonie. Adkazvajučy, Załužny taksama zakranuŭ temu mahčymaści ŭstupleńnia Ukrainy ŭ NATA.

«Ja vielmi dobra viedaju NATA. Kala dvanaccaci hadoŭ asabista zajmaŭsia tym, kab my zasvoili standarty NATA. I kožny hod słuchaŭ kazki pra toje, što voś-voś-voś my ŭstupim u NATA. Na žal, my nikoli ŭ jaho nie ŭstupim!» — zajaviŭ były hałoŭnakamandujučy USU.

Pavodle słoŭ Załužnaha, pieraškodaj dla ŭstupleńnia Ukrainy ŭ aljans źjaŭlajecca toje, što «niemahčyma dałučycca z tym uzroŭniem raźvićcia, jaki siońnia majuć Uzbrojenyja siły Ukrainy… da arhanizacyi, jakaja kirujecca daktrynami Druhoj suśvietnaj vajny».

Pry hetym były hałoŭnakamandujučy nie ličyć, što NATA ŭ najbližejšy čas źmienić padychod da svajoj unutranaj arhanizacyi.

«Chutčej za ŭsio, NATA zastaniecca ŭ tym vyhladzie, u jakim jano jość. I projdzie jašče hadoŭ dvanaccać, pakul Ukraina budzie pierachodzić na standarty, jakich nieabchodna dasiahnuć, kab chacia b nablizicca da pałovy ŭzroŭniu Rasijskaj Fiederacyi», — skazaŭ Załužny.

Niahledziačy na takuju acenku, były vajskoviec i dypłamat pryznaŭ, što «Ukrainie patrebnyja technałohii, jakija na siońniašni dzień jašče jość u krainach NATA», u tym liku ŭ śfiery supraćrakietnaj abarony. Alternatyvaj harantavańnia biaśpieki Ukrainy były hałoŭnakamandujučy bačyć udzieł krainy ŭ novych i tych, što jašče farmirujucca, abaronnych sajuzach — takich jak JEF.

«Ukraina… budzie dałučacca da błokaŭ i sajuzaŭ, jakija, vidać, buduć uźnikać. Najchutčej havorka pojdzie pra jeŭrapiejski vajenna-biaśpiekavy błok», — zajaviŭ Załužny.

Abjadnanyja ekśpiedycyjnyja siły byli stvoranyja ŭ 2015 hodzie. U hetuju kaalicyju pad kiraŭnictvam Vialikabrytanii ŭvachodziać Danija, Finlandyja, Estonija, Isłandyja, Łatvija, Litva, Niderłandy, Šviecyja i Narviehija. Metaj kaalicyi źjaŭlajecca zabieśpiačeńnie biaśpieki ŭ Paŭnočnaj Jeŭropie, uklučajučy Bałtyjski rehijon i Arktyku.

U śniežni 2025 hoda Ukraina atrymała status pašyranaha partniora JEF. Pry hetym kaalicyja supracoŭničaje z NATA ŭ pytańniach strymlivańnia Rasii na mory, a taksama zajaŭlała pra hatoŭnaść užyć žorstkija miery suprać tak zvanaha «cieniavoha fłotu» Rasii.

Załužny vykazaŭ škadavańnie z nahody taho, što, pavodle jaho słoŭ, Ukraina nie pracuje nad paŭnavartasnym ustupleńniem u JEF. U toj ža čas były hałoŭnakamandujučy adznačyŭ, što orhany kiravańnia hetaj kaalicyi «pakul davoli słabyja» i «jašče nie znachodziacca na tym uzroŭni, kab možna było skazać, što jany nam padychodziać».

• 0
• 0
• 0
• 0
• 0
• 0
• 0
• 0