«Heta znak taho, što kiroŭca — bydła». Minčukoŭ aburyŭ rasijski aŭtamabil. Što hetym razam?
U centry Minska kala adnoj z kaviarniaŭ minaki zaŭvažyli pazadarožnik z rasijskimi numarami, uładalnik jakoha pakazaŭ jašče adzin varyjant nachabstva rasijskich kiroŭcaŭ. Fotazdymkam niezvyčajnaha «ciuninhu» padzialiŭsia karystalnik Threads Jarasłaŭ.
Na numarach pryparkavanaj mašyny visieła zvyčajnaja budaŭničaja palčatka, jakaja zakryvała pieršyja ličby. Aŭtar publikacyi iranična prapanavaŭ padpisčykam adhadać pryznačeńnie hetaha aksiesuara: ci heta «abiareh ad štrafaŭ», ci režym «nievidzimki», ci prosta znak «ja ŭ haściach».
Bolšaść kamientataraŭ śmiechu aŭtara nie padtrymali, paličyŭšy takija pavodziny niepavahaj da inšaj krainy.
«Chočuć parušać PDR i źjechać z krainy biez štrafaŭ. Hańbišča».
«Takija hości nam nie patrebnyja».
«Heta znak taho, što kiroŭca bydła».
«Na mašynu chapiła, a na štraf i parkoŭku hrošaj nie zastałosia».
«U Homieli za apošnija 15 hadoŭ zaŭvažaju: jak tolki numary RF, dyk u 90 adsotkach vypadkaŭ abaviazkova nie vykonvajuć PDR. Nie padabajecca mnie hetaja statystyka».
«Žyła sabie Biełaruś biez prablem, a potym pryjechaŭ «starejšy brat».
Niekatoryja karystalniki pasprabavali vykazać dumku, što kiroŭca vypadkova zabyŭsia palčatku paśla niejkaha ramontu, adnak aŭtar pasta raźviejaŭ sumnievy — dakładna taki ž aksiesuar visieŭ i na piarednim numary aŭtamabila.
Na incydent adreahavaŭ aficyjny akaŭnt staličnaj milicyi ŭ Threads. Administratar paviedamiŭ, što infarmacyja pieradadziena supracoŭnikam DAI dla praviadzieńnia pravierki.
Heta ŭžo nie pieršy vypadak, kali zamiežnyja kiroŭcy traplajuć u pole zroku minskaj Dziaržaŭtainśpiekcyi dziakujučy sacsietkam. Raniej da adkaznaści była pryciahnutaja hramadzianka Kazachstana, jakaja pryparkavała mašynu prosta na tratuary kala «Akademknihi». Padčas razboru vyśvietliłasia, što za joj ličacca i inšyja parušeńni, uklučajučy parkoŭku na miescy dla invalidaŭ kala HC «Zamak» i pieravozku dziciaci bieź śpiecyjalnaha kresła.
Kamientary
pdr s vostoka narušajet PDR, čto tut strannoho.