Tramp: Zialenskamu i Pucinu treba sustrecca, ale jany nie viedajuć, jak
Kiraŭnik ZŠA adznačyŭ, što razmaŭlaŭ i z prezidentam Rasii, i z prezidentam Ukrainy.
Prezident ZŠA zajaviŭ, što prezidentu Ukrainy i rasijskamu dyktataru nieabchodna pahavaryć, i raskazaŭ, što pieraškadžaje hetamu zrabić. Pra heta Tramp zajaviŭ padčas vystupu na samicie G7, piša RBK-Ukraina.
Prezident ZŠA adznačyŭ, što razmaŭlaŭ i z Uładzimiram Zialenskim, i pa telefonie z Uładzimiram Pucinym.
«Zdajecca, što tam vielmi šmat sałdat stračvajuć abodva baki. Rasija bolš stračvaje, tamu što jany atakujuć. Kali vy atakujučy ŭ vajnie, nastupajecie ŭ vajnie, vy stračvajecie bolš ludziej», — skazaŭ Tramp.
Jon adznačyŭ, što padčas niadzielnaj razmovy z rasijskim dyktataram padzialiŭsia svajoj infarmacyjaj. Prezident ZŠA taksama zajaviŭ, što razmovy z prezidentami abiedźviuch krain byli «vielmi ŭdałymi» i vykazaŭ upeŭnienaść, što im treba pahavaryć. «Im treba pahavaryć, ale jany prosta nie viedajuć, jak heta zrabić. Jany prosta nie viedajuć, jak im pierahavaryć pamiž saboj», — padkreśliŭ Tramp.
Paśla ŭrehulavańnia situacyi vakoł Irana Tramp zajaviŭ, što nastupnym pryjarytetam dla Vašynhtona stanie pošuk šlachoŭ spynieńnia rasijska-ŭkrainskaj vajny.
Pavodle jaho słoŭ, štomiesiac bajavyja dziejańni zabirajuć žyćci kala 25 tysiač čałaviek.
Taksama Zialenski i Tramp abmierkavali mahčymaść praviadzieńnia pieramoŭ z udziełam rasijskaha dyktatara na terytoryi ZŠA. Čakajecca, što taki farmat moh by ŭskładnić dla kramloŭskaha lidara ŭchileńnie ad pramoha dyjałohu.
U toj ža čas u MZS Hiermanii nie vyklučajuć, što pieramoŭny praces pa zaviaršeńni vajny va Ukrainie moža pačacca ŭžo letam. U Bierlinie ličać, što vajna faktyčna zajšła ŭ tupik, i Pucin moža razhladać varyjant dypłamatyčnaha ŭrehulavańnia.
Ciapier čytajuć
35 maładych biełarusaŭ i biełarusak, za jakimi varta sačyć: apublikavany pieršy śpis Next 3532
Kamientary