Raniej Dźmitryj Šlachcin pracavaŭ u Administracyi Łukašenki i byŭ dyrektaram muzieja Vialikaj Ajčynnaj vajny. Ale nie spracavaŭsia z novym ministram, Maratam Markavym.
Pieršaha namieśnika ministra kultury Dźmitryja Šlachcina zvolnili z pasady.
Svajo kresła jon zajmaŭ sa śniežnia 2024‑ha (jaho pryznačyli ŭ toj ža dzień, što i Rusłana Čarnieckaha ministram).
Ale paśla prychodu Marata Markava na pasadu ministra kultury Šlachcin doŭha nie pratrymaŭsia. Apošniaje intervju ŭ jakaści pieršaha namieśnika jon davaŭ u mai. Jak stała viadoma «Našaj Nivie», niadaŭna jaho zvolnili. A taksama vykraślili sa śpisu patencyjnych dyrektaraŭ u Nacyjanalny histaryčny muziej (jaki paśla inśpiekcyi Łukašenki, padobna, źmienić nazvu).
Šlachcin byŭ inicyjataram idei pazbavić samastojnaści muziei Janki Kupały i Jakuba Kołasa — ich mohuć uklučyć u skład Dziaržaŭnaha muzieja historyi biełaruskaj litaratury ŭ jakaści filijałaŭ. Taksama jon prapanoŭvaŭ zakryć Muziej historyi teatralnaj i muzyčnaj kultury. Kali supracoŭniki kultury pačali pieražyvać za los ekspanataŭ pry takim raźvićci padziej, Šlachcin hrebliva skazaŭ, što ich treba skłaści ŭ karobki i vynieści na śmietnicu.
Dźmitryju Šlachcinu 42 hady. Jon vypusknik histfaka BDU (muziejnaje adździaleńnie). Pačynaŭ svoj šlach u Nacyjanalnym histaryčnym muziei. Z 2010 hoda pracavaŭ va ŭpraŭleńni ŭstanoŭ kultury i narodnaj tvorčaści Ministerstva kultury, z 2014‑ha — va ŭpraŭleńni sacyjalna-kulturnaj palityki hałoŭnaha ideałahičnaha ŭpraŭleńnia Administracyi Łukašenki.
U 2016‑m Šlachcin staŭ dyrektaram Muzieja historyi Vialikaj Ajčynnaj vajny. Paźniej byŭ načalnikam sakrataryjata Banka raźvićcia.
Kamientary
"Na sohłasovanii v Ministierstvie Kultury druhaja kandidatura"
Ułasnaručnaja rezalucyja na typavym błanku "Hosudarstviennoj słužby zaniatosti i socialnoj zaŝity nasielenija" z majoj familijaj.
Jak vakansija? Znajšła dastojnuju kandydaturu?