Tramp zaściaroh Ukrainu ad atak na nie rasijskija naftavyja tankiery ŭ Čornym mory

Pavodle infarmacyi haziety, asablivuju zaniepakojenaść u Vašynhtonie vyklikaje biaśpieka Kaśpijskaha trubapravodnaha kansorcyuma (KTK). Praź jaho nafta z Kazachstana pastupaje na jeŭrapiejskija rynki, i hety maršrut ličycca važnaj alternatyvaj pastaŭkam rasijskich enierhanośbitaŭ.

Padstavaj dla abmierkavańnia stała ataka bieśpiłotnikaŭ na marski terminał KTK u Novarasijsku 19 lipienia, paśla jakoj była časova spyniena pahruzka nafty na tankiery. U KTK zajavili, što kansorcyum nie znachodzicca pad sankcyjami, abjadnoŭvaje kampanii z Rasii, ZŠA, Kazachstana i krain Zachodniaj Jeŭropy, a napad na jaho infrastrukturu i cyvilnyja sudny nazvali ŭdaram pa intaresach krain — udzielnic kansorcyuma i abjekcie, jaki abaronieny mižnarodnym pravam.

Jak śćviardžaje The Wall Street Journal, z pradstaŭnikami Biełaha doma kantaktavała i amierykanskaja kampanija Chevron, jakaja vałodaje 15% akcyj KTK i pałovaj akcyj kazachstanskaha radovišča Tenhiz. Hetaje radovišča zabiaśpiečvaje kala 12% suśvietnaj zdabyčy kampanii. Kiraŭnictva Chevron abmiarkoŭvała z amierykanskimi čynoŭnikami mahčymyja nastupstvy dla naftavaha rynku i sposaby abarony svaich intaresaŭ.

Za apošnija hady kampanija ŭkłała kala 48 miljardaŭ dalaraŭ u pašyreńnie zdabyčy na Tenhizie, pavialičyŭšy jaje da prykładna adnaho miljona barelaŭ za sutki. Pavodle acenak Chevron, u vypadku praciahłych napadaŭ na infrastrukturu KTK kampanii, vierahodna, daviadziecca skaračać zdabyču.

Pavodle infarmacyi vydańnia, sam trubapravod i radoviščy nie byli paškodžanyja, adnak praciahłyja pieraboi mohuć istotna paŭpłyvać na dachody Chevron u rehijonie. Praź sistemu KTK štodnia transpartujecca kala 1,4 miljona baralaŭ nafty, bolšaja častka jakoj nakiroŭvajecca ŭ Jeŭropu.

Raniej terminał KTK u Novarasijsku ŭžo prypyniaŭ pracu paśla atak bieśpiłotnikaŭ, što prymusiła Kazachstan skaracić zdabyču nafty. Pavodle danych Bloomberg, kala 80% kazachstanskaha ekspartu nafty ažyćciaŭlajecca praz trubapravodnuju sistemu KTK. Ministerstva zamiežnych spraŭ Kazachstana asudziła ataki, nazvaŭšy ich nieprymalnymi i takimi, što škodziać ekanamičnym intaresam krainy i stabilnaści suśvietnaha enierhietyčnaha rynku.

U svaju čarhu pasoł Ukrainy ŭ Kazachstanie Viktar Majko adchiliŭ abvinavačańni ŭ datyčnaści Kijeva da napadaŭ na tankiery kala terminała KTK. Pavodle jaho słoŭ, dokazaŭ taho, što hetyja ataki byli ździejśnienyja ŭkrainskim bokam, niama, i jon zaklikaŭ ustrymacca ad nieabhruntavanych abvinavačvańniaŭ.

• 2
• 0
• 1
• 0
• 0
• 0
• 1
• 0