Eks-pasła Vialikabrytanii ŭ Biełarusi pieraśledavała jaho byłaja: žančyna ŭčyniła dypłamatu sapraŭdnaje piekła
Były pasoł Vialikabrytanii ŭ Biełarusi Najdžeł Hułd-Devis apynuŭsia ŭ centry dramatyčnaj historyi, jakaja mahła b stać asnovaj detektyŭnaha sieryjała.
Najdžeł Hułd-Devis uznačalvaŭ brytanskuju dypmisiju ŭ Minsku ŭ 2008—2009 hadach.
Letam 2023 hoda jon paznajomiŭsia ŭ dadatku dla znajomstvaŭ Bumble z žančynaj. Jana pradstaviłasia jak Nur Chajam, apisvajecca ŭ prysudzie Łondanskaha suda ad 11 lipienia 2025 hoda, jaki vyvučyła «Naša Niva».
Nieŭzabavie pamiž imi zaviazalisia adnosiny: jany razam chadzili ŭ teatr i restarany, jana časta byvała ŭ jahonaj kvatery, a dypłamat navat padtrymlivaŭ jaje paśla taho, jak joj pastavili dyjahnaz rak hrudziej. Adnak užo praź niekalki tydniaŭ paśla pačatku ramanu žančyna raspačała suprać dypłamata praciahłuju kampaniju pieraśledu.
Pačynajučy ź vieraśnia 2023 hoda, Hułd-Devis i jahonaje atačeńnie pačali atrymlivać šmatlikija listy i paviedamleńni. Jany nibyta pastupali ad roznych ludziej, ale nasamreč usio rabiła Nur Chajam. Pra toje, što piekła jamu ŭčyniła mienavita jaho byłaja, dypłamat da apošniaha nie viedaŭ.
Žančyna zrabiła falšyvyja akaŭnty ŭ sacyjalnych sietkach i padrobleny sajt, dzie abvinavačvała byłoha partniora ŭ chatnim hvałcie, sieryjnym ździeku z žančyn, psichičnych zachvorvańniach, parušeńni brytanskaha Zakona ab dziaržaŭnych sakretach (Official Secrets Act), a taksama ŭ datyčnaści da admyvańnia hrošaj.
Hetyja materyjały jana rassyłała pracadaŭcam dypłamata, jaho kaleham, palitykam, žurnalistam, advakatam i navat jaho bratu. Kali daviedałasia, što Hułd-Devis razhladaje mahčymaść padać zajaŭku na akademičnuju pasadu ŭ Harvardskim univiersitecie, anałahičnyja abvinavačańni byli nakiravanyja i tudy.
Kali Hułd-Devis vystupaŭ ekśpiertam u kamiercyjnaj sudovaj sprečcy suprać rasijskich biznesmienaŭ, žančyna skrała kanfidencyjny dakumient, padrychtavany im dla suda, i pahražała pieradać jaho tym, suprać kaho jon vystupaŭ.
Žančyna taksama vykrała pašpart dypłamata. Z-za hetaha jon nie zmoh palacieć u Ispaniju, kab sustreć Kalady z maci, i byŭ vymušany zastacca ŭ Łondanie. Akramia taho, jana atrymała dostup da rekvizitaŭ jaho bankaŭskich kartak i biez dazvołu ŭładalnika zrabiła šerah pakupak i bankaŭskich pieravodaŭ na ahulnuju sumu bolš za 13,6 tysiačy funtaŭ sterlinhaŭ.
Paśla razryvu adnosin u pačatku 2024 hoda pieraśled tolki ŭzmacniŭsia. Hułd-Devis navat pierajechaŭ na čas u bierlinski ofis Mižnarodnaha instytuta stratehičnych daśledavańniaŭ, kab schavacca. Adnak paviedamleńni praciahvali prychodzić.
Byłaja partniorka sprabavała vyśvietlić jaho miescaznachodžańnie: jeździła ŭ Ispaniju ŭ rajon, dzie žyvie jaho maci, źviazvałasia z bratam u ZŠA, a paśla intervju dypłamata telekanału CNN zdoleła vyznačyć hatel u Bierlinie, dzie jon spyniŭsia. Hułd-Devis byŭ vymušany niekalki razoŭ źmianiać miesca žycharstva.
Paśla pierajezdu ŭ Bierlin Hułd-Devis sprabavaŭ vyśvietlić, chto stvaryŭ falšyvy sajt, pryśviečany jamu i napoŭnieny paklopnickimi materyjałami. Mienavita padčas hetych pošukaŭ jon zrazumieŭ, što za ŭsim stajała jaho byłaja, i daviedaŭsia jaje sapraŭdnaje imia — Fara Damdžy.
11 sakavika 2024 hoda, na nastupny dzień paśla taho, jak Damdžy paviedamiła byłomu partnioru, što znajšła jaho ŭ Bierlinie, jana vypraviłasia ŭ Hiermaniju. Adnak u łondanskim aeraporcie Chitroŭ jaje zatrymała palicyja. Pry zatrymańni ŭ žančyny znajšli vykradzieny pašpart Hułd-Devisa, a taksama noŭtbuk i niekalki mabilnych telefonaŭ, paroli ad jakich jana admoviłasia paviedamić śledstvu.
U mai 2025 hoda prysiažnyja pryznali Faru Damdžy vinavataj pa ŭsich čatyroch punktach abvinavačańnia — u pieraśledzie, kradziažy i dvuch epizodach machlarstva. Z ulikam składańnia pakarańniaŭ ahulny termin skłaŭ šeść hadoŭ pazbaŭleńnia voli. Paśla vyzvaleńnia joj taksama zabaroniena lubym čynam kantaktavać z Najdžełam Hułd-Devisam, jaho bratam i jašče adnym paciarpiełym.
Padčas suda Hułd-Devis zajaviŭ, što heta byŭ samy ciomny i strašny pieryjad u jaho žyćci. Jon byŭ vymušany źviarnucca da psichaterapieŭta, prymać leki ad tryvožnaści, a ŭ 2024 hodzie ŭ jaho dyjahnastavali posttraŭmatyčny stresavy razład.
Pavodle jaho słoŭ, jurydyčny termin «stałkinh» nie pieradaje taho, što jon pieražyŭ, bo žančyna žyła pobač ź im, viedała ŭsie jaho strachi i słabaści, a paśla vykarystała ich suprać jaho. «Heta byŭ nie prosta stałkinh, a sapraŭdnaja psichałahičnaja vivisiekcyja», — skazaŭ jon.
Vyśvietliłasia, što dla 58‑hadovaj Damdžy heta była daloka nie pieršaja kryminalnaja sprava. Jana ŭžo nieadnarazova była asudžanaja ŭ Vialikabrytanii za kradziažy, machlarstva i pieraśled. U 2016 hodzie jaje prysudzili da piaci hadoŭ pazbaŭleńnia voli za pieraśled troch čałaviek. Paśla vyzvaleńnia jana parušyła sudovuju zabaronu, uciakła ŭ Irłandyju, adnak była ekstradavanaja nazad u Vialikabrytaniju. Sudździa adznačyŭ, što kampanija pieraśledu suprać byłoha pasła šmat u čym paŭtarała jaje raniejšyja złačynstvy.
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary