Chłopiec u Maładziečnie kinuŭ zavod ź mizernym zarobkam i staŭ rasklejščykam abjavaŭ
Zarobak na zavodzie, dzie Andrej rabiŭ stanočnikam, byŭ 600 rubloŭ pry vaśmihadzinnym pracoŭnym dni. Zaraz hałoŭnaje, kab zarobak byŭ nie mienš za 2000 rubloŭ.
Andreju 21 hod. Rasklejvać abjavy jon pajšoŭ nie ad dobraha žyćcia, a tamu, što inšaj narmalnaj, na jaho dumku, pracy znajści nie moža, piša Kraj.by.
Chłopiec skončyŭ kaledž pa śpiecyjalnaści stanočnika, choć pryznaje: u siaredniuju śpiecyjalnuju navučalnuju ŭstanovu jon pajšoŭ nie ź vialikaj luboŭju da stankoŭ, a prosta tamu, što kudyści treba było iści vučycca.
— Paśla kaledža ja na praciahu hoda adpracoŭvaŭ na pradpryjemstvie ŭ Maładziečanskim rajonie. Staŭleńnie da mianie było drennaje. Patrabavali šmat, a płacili mała, — raskazvaje Andrej. — Faktyčna ja atrymlivaŭ pałovu zarobku. 100 rubloŭ mnie płacili avansam. 500 rubloŭ ja atrymlivaŭ u jakaści zarpłaty. Razam — kala 600 rubloŭ u miesiac pry vaśmihadzinnym rabočym dni i piacidzionnym rabočym tydni.
Majstar mnie kazaŭ, što ja ŭsiamu pavinien navučycca sam, adpraŭlaŭ da inšych rabočych pa dapamohu, ale ŭsim im było nie da mianie. Tak ja tołkam ničomu nie navučyŭsia i vyrašyŭ, što treba šukać inšuju pracu.
Pra toje, što patrabujucca rasklejščyki abjaŭ, Andrej daviedaŭsia ŭ internecie.
Ofis pracadaŭcy znachodzicca ŭ Minsku. Spačatku Andrej kleiŭ abjavy tolki ŭ staličnych padjezdach. Pracavać davodziłasia, dy i ciapier davodzicca, u roznych rajonach stalicy. Da miesca rasklejki abjaŭ dabiraješsia samastojna.
— Vyjazdžaŭ z Maładziečna na elektryčcy ŭ 07:20. U 09:20 ja ŭžo byŭ u ofisie. Tam treba prykładna paŭhadziny, kab rasfasavać abjavy, raskłaści ich. Potym jašče kala hadziny traciš na toje, kab dabracca da rajona, u jaki ciabie nakiroŭvajuć. Sama rabota pa rasklejcy zajmaje kala čatyroch hadzin. Nazad u Maładziečna ja viartaŭsia, sadziačysia na elektryčku ŭ 16:00 abo 16:50, — raskazvaje naš surazmoŭca.
— Składana skazać, kolki hrošaj možna zarabić za miesiac pry takim hrafiku, — razvažaje Andrej. — Usio zaležyć ad taho, kolki dzion ty hatovy pracavać u takim režymie.
Ale za dzień u mianie atrymlivałasia niedzie 45—50 rubloŭ. Heta značyć, asabliva nie napružvajučysia i pracujučy 20 dzion u miesiac, možna zarablać 1000 rubloŭ. Nu a toj, chto žyvie ŭ Minsku, biare bolšy abjom raboty i zarablaje da 2000 rubloŭ.
Na siońniašni dzień Andrej užo kala miesiaca kleić abjavy ŭ svaim Maładziečnie, ale znoŭ ža pa zadańni staličnaj firmy. Kiraŭnictva kampanii idzie nasustrač i, kali jość praca ŭ Maładziečnie, pakidaje svajho supracoŭnika ŭ rodnym horadzie, choć i nie kožny tydzień. Jeździć u Minsk usio roŭna davodzicca.
— Nu a pracujučy ŭ Maładziečnie, atrymlivaju zadańnie z ukazańniem kankretnych rajonaŭ i pačynaju ich adpracoŭvać. Za tydzień u svaim horadzie ja mahu kleić abjavy čatyry ci piać dzion na tydzień i zarabić za hety tydzień 400 rubloŭ. Całkam narmalnaja adpaviednaść abjomu raboty i zarobku, — adznačaje Andrej.
— Voś siońnia, naprykład, rasklejvaju šeść vidaŭ abjaŭ.
Składaniej pracavać z damami, u jakich mała padjezdaŭ. Adpaviedna, treba abyści bolš damoŭ, bo kolkaść abjaŭ zastajecca takoj ža. U hety dzień ich było prykładna 200.
Vielmi važna, na jakuju asnovu kleiš abjavu. Nie ŭ kožnym padjeździe jość draŭlanaja doška. Kali jana jość — heta značna zručniej, bo klej lepš trymajecca.
Načalstva, vydajučy zadańnie, pieradaje svajmu rabotniku kartu rajona horada, jaki ŭ hety dzień treba abkleić. U jakaści spravazdačy kiraŭnictvu nieabchodna adpravić nazad tuju ž kartu z damami, na jakich visiać abjavy, paznačyŭšy ich kryžykami. Taksama treba vybaračna dasłać fatahrafii došak z tvaimi abjavami.
— A ŭčora navat dyrektar ź Minska pryjazdžaŭ, kab asabista pahladzieć vyniki majoj raboty, — adznačyŭ Andrej.
Razam z tym praca nie samaja ŭdziačnaja. Daloka nie ŭsim žycharam padabajucca «ŭpryhožvańni» na ich padjezdach u vyhladzie rekłamy.
Za tyja paŭhadziny, za jakija razmaŭlali z Andrejem, z adnaho z padjezdaŭ źnikli ŭsie vyniki jaho pracy. Niejki biaźlitasny žychar prosta sarvaŭ usie šeść abjaŭ i vykinuŭ ich.
Jakaja samaja śmiešnaja abjava, jakuju jamu davodziłasia rasklejvać na padjezdach damoŭ.
Andrej uśmichnuŭsia i skazaŭ:
— Ja navat mahu pakazać fatahrafiju takoj abjavy! U Minsku jaho rasklejvaŭ!
Chłopiec paviedamiŭ, što šukaje sabie dziaŭčynu, i navat prykłaŭ svaju fatahrafiju. Pry bližejšym razhladzie abjavy vyśviatlajecca, što charyzmatyčny i dobry chłopiec Loša, jakomu 19 hadoŭ, «dastatkova śviadoma šukaje sabie dziaŭčynu».
«Kali ja tabie źniešnie spadabaŭsia, to, moža, pasprabujem pahutaryć? Raptam sapraŭdy niešta atrymajecca», — źviartajecca Loša da svajoj patencyjnaj vybrańnicy.
U Maładziečnie taksama jość abjavy, jakija vyklikajuć uśmiešku. Voś, naprykład, niechta hatovy kupić lubuju nieruchomaść — kvateru, pakoj, dolu žylla. Abiacaje pahasić daŭhi, kredyty, apłacić pryvatyzacyju, adrazu ž unieści avans za nieruchomaść.
Ale pry hetym upłyvovy ŭdzielnik rynku nieruchomaści čamuści dahetul nie zarabiŭ sabie na kampjutar i piša svaje abjavy ad ruki.
Siamja Andreja — heta jaho mama i starejšaja siastra. Abiedźvie pracujuć. Siastra, naprykład, u Minsku pracuje na internet-resursach.
Chłopiec kaža, što hatovy kinuć svaju dziejnaść pa rasklejcy abjaŭ, ale tolki ŭ tym vypadku, kali znojdzie pracu, dzie płaciać bolš. Razhladaje, naprykład, varyjant pracy načnym kamplektoŭščykam.
Hałoŭnaje, kab zarobak byŭ nie mienš za 2000 rubloŭ na ruki.
Praŭda, Andrej sumniavajecca, što takuju pracu možna znajści ŭ Maładziečnie. A voś vierahodnaść taho, što jon pojdzie pracavać stanočnikam pa svajoj śpiecyjalnaści, całkam vyklučaje.
Ciapier čytajuć
Taćciana Zamiroŭskaja pieršy raz za 11 hadoŭ viarnułasia z ZŠA ŭ Jeŭropu. Mnohija maniery, zvyčki i navat ptuški, jakich my nie prykmiačajem, vyklikali ŭ jaje buru ŭspaminaŭ99
Kamientary