Hierasimaŭ dałažyŭ Pucinu pra zachop Dabrapolla na Danbasie. Jaho abvierhli Z-błohiery
Rasijskija Z-błohiery abvierhli zajavu načalnika Hienieralnaha štaba Uzbrojenych sił Rasii Valeryja Hierasimava pra poŭny zachop horada Dabrapolle ŭ Danieckaj vobłaści. Napiaredadni jon dałažyŭ pra heta prezidentu Uładzimiru Pucinu, adnak paviedamleńnie vyklikała krytyku navat siarod prychilnikaŭ rasijskaha ŭvarvańnia, piša The Moscow Times.
Pa słovach Hierasimava, Dabrapolle, jakoje źjaŭlajecca važnym łahistyčnym vuzłom ukrainskaj abarony, było «vyzvalenaje» padraździaleńniami hrupoŭki «Centr». Jon taksama zajaviŭ, što ŭ horadzie praciahvajucca pošuki i źniščeńnie asobnych ukrainskich vajskoŭcaŭ, jakija nibyta chavajucca ŭ padvałach budynkaŭ. Pucin nazvaŭ heta «značnaj padziejaj», jakaja adkryvaje šlach da miežaŭ tak zvanaj DNR.
Adnak Z-kanał «Vojennyj ośviedomitiel» pastaviŭ pad sumnieŭ nie tolki zajavu pra Dabrapolle, ale i inšyja śćviardžeńni Hierasimava. Bo, kali vieryć rasijskamu hienierału, byli taksama zachoplenyja sioły Alaksiejeva-Družkoŭka i Siarhiejeŭka ŭ Danieckaj vobłaści, a ŭ Charkaŭskaj vobłaści zavieršanaje źniščeńnie dvuchtysiačnaj hrupoŭki USU, jakaja nibyta trapiła ŭ abłohu.
«Vojennyj ośviedomitiel» apublikavaŭ frahmient videa Ministerstva abarony Rasii, jakoje pavinna było paćviardžać kantrol nad Dabrapollem. Aŭtary kanała zajavili, što videa mahło być stvoranaje z dapamohaj štučnaha intelektu, źviarnuŭšy ŭvahu na nierealistyčnyja ruchi vajskoŭca z rasijskim ściaham.
Inšy Z-błohier, Alex Parker Returns, ź ironijaj zaŭvažyŭ, što Pucinu znoŭ mahli dałažyć pra zachop horada, jaki faktyčna nie ŭziaty. Jon nahadaŭ pra papiarednija zajavy rasijskich vajskoŭcaŭ adnosna Śviatahorska i Kupianska, jakija taksama nie atrymali paćviardžeńnia.
«Vojennyj ośviedomitiel» spasłaŭsia i na analiz kanała «Dom Osintierov», pavodle jakoha rasijskija vojski kantralujuć paŭdniovuju i značnuju častku centralnaj častki Dabrapolla. Adnak, jak adznačajuć aŭtary, hetyja źviestki nie śviedčać pra ŭstojlivuju prysutnaść rasijskich vajskoŭcaŭ u astatniaj častcy horada.
Ukrainski OSINT-prajekt Deep State taksama nie paćviardžaje rasijskaha kantrolu nad Dabrapollem: pavodle jaho karty, horad całkam znachodzicca pad kantrolem USU.
Zajavu Hierasimava abvierh i Z-błohier Anatol Radaŭ. Jon adznačyŭ, što paviedamleńni rasijskaha kamandavańnia vyklikajuć, miakka kažučy, ździŭleńnie ŭ tych, chto znachodzicca niepasredna na miescy padziej.
Hienieralny štab USU taksama zajaviŭ, što infarmacyja pra zachop Dabrapolla nie adpaviadaje rečaisnaści. Pavodle pradstaŭnika ŭkrainskaha Hienštaba Andreja Kavalova, horad zastajecca pad kantrolem Ukrainy.
Pucin zavysiŭ kolkaść zachoplenych sioleta ŭkrainskich ziemlaŭ u 45 razoŭ
Hałoŭnakamandujučy NATA: My majem vidavočnuju vajskovuju pieravahu nad Rasijaj
Rasijskija vajenkary nazvali Kanstancinaŭku «druhim Kupianskam», a ŭkrainskija vajskoŭcy zładzili ŭ horadzie fłešmob
Kreml apublikavaŭ videa z Pucinym u vobrazie pałkavodca
Ciapier čytajuć
Cichanoŭski: Cichanoŭskaj možna było ŭ 2020‑m nie pabajacca turmy. I, moža, u biełarusaŭ byŭ by šaniec121
Kamientary