«Tuzin. Unplugged» — 25 krasavika

Z nahody siamihodździa dziejnaści internet-partału «Tuzin Hitoŭ» va ŭtulnym klubie «Hrafici» projdzie niezvyčajny kancert «Tuzin. Unplugged», u jakim voźmuć udzieł hieroi hetaha muzyčnaha sezonu — hurty «Žniuv» i Re1ikt, viečnyja hieroi — hurt «Pałac» i budučyja hieroi — hurt Monkey Bite.

Admysłova da «tuzinoŭskaj» viečaryny kožny z vystupoŭcaŭ padrychtavaŭ ekskluziŭny set. Monkey Bite ličać siabie paśladoŭnikami hurta Zet. Jany pačali svaju karjeru jakraz u toj hod, kali ŭtvaryŭsia «Tuzin Hitoŭ», repetavali ŭ Michanavičach, davali kancerty dla «miascovych», a potym vyjšli i na mienskija placoŭki, hrali razam z hurtom «Cmoki» i Zet, jakich nazyvajuć svaimi kumirami. Paśla vaśmihadovaha pierapynku muzyki viartajucca na scenu. Admysłova dla «Tuzin. Unplugged» hety pank-hurt rychtuje akustyčny set, kab ździvicca samim i padzivić publiku svaim novym hučańniem. «Našyja pieśni pra tych, chto sočyć za nami z błakitnych lusterkaŭ, pra ludziej, jakija vymušanyja adčuvać siabie harbatymi ŭ rodnaj krainie, i marać skinuć narešcie kamiani sa svaich sercaŭ», — kažuć muzyki.

Inšyja ŭdzielniki «Tuzin. Unplugged» u 2003 hodzie jakraz prypynili karjeru. Hurt «Žniuv» pačynaŭ pry kancy 90-ch. Jak ni dziva, taksama dzialiŭ scenu z Zet, a jašče z «Kramaj» i «Leprykonsami», pieramahaŭ na festyvalach «Pieršaja placoŭka» i «Rok-schvatka». Uźjadnalisia muzyki ŭ 2009 hodzie. Pieršaja pieśnia adnoŭlenaj kamandy mieła vializarny pośpiech na «Tuzinie Hitoŭ». Tvor «Nie chvalujsia» piać razoŭ pieramahaŭ u čarcie i trapiŭ u lik lepšych piesień sezonu. Vidać, taki ž los čakaje ich novuju pieśniu «Zasucha», jakaja ŭžo čatyry razy ŭzdymałasia na pieršuju prystupku ŭ «Tuzinie». Hetyja dy inšyja svaje pieśni muzyki abiacajuć syhrać na «Tuzin. Unplugged» u kamernym varyjancie. «Nam vielmi pryjemna, što nas zaprasili pryniać udzieł u hetym kanciercie. Tamu što „Tuzin“ dla nas byŭ admysłovaj startavaj placoŭkaj, kali my viarnulisia ŭ muzyku. Nu i dziakujučy ŭdziełu ŭ hit-paradzie my ździejśnili maru našaha vakalista Aleha i trapili na BASy. Što ŭ vyniku paŭpłyvała na napisańnie nami jašče bolš piesień na rodnaj movie. A 25-ha my ŭpieršyniu adyhrajem całkam biełaruskamoŭny akustyčny set», — abiacajuć muzyki.

Hurt Re1ikt byŭ nazvany «Adkryćciom hodu ŭ biełaruskaj muzycy» pa versii «Tuzina Hitoŭ» u 2009 hodzie. Z taho času muzyki dali bieźlič kancertaŭ, zapisali dva dyski na biełaruskaj movie («Vytoki» i svoj novy albom). Muzyki śćviardžajuć, što na siońnia jany majuć badaj samy vialiki dośvied vystupaŭ «anpłahd» siarod maładych biełaruskich hurtoŭ, tamu vystupić na «Tuzin. Unplugged» — dla ich absalutna naturalna. Tym bolš, što jany častyja hości ŭ hit-paradzie i ličać, što užo paradnilisia z TH. «My tak šmali hrali ŭ akustycy — i na adkrytym pavietry, i ŭ muzejach, i na festyvalach, i na kvaternikach — što pryjšoŭ čas pravieści niejkuju rysu. Naš vystup na „Tuzin. Unplugged“ budzie peŭnaj spravazdačaj, dzie my zajhrajem najlepšyja tvory», — kažuć udzielniki Re1ikt.

Hurt «Pałac» rychtuje admysłovuju prahramu, z uvahaj na vialikodnyja-vałočobnyja tvory, pakolki «Tuzin. Unplugged» projdzie na nastupny dzień paśla Paschi. A vieści imprezu budzie lider «Pałacu» Aleh Chamienka, niaźmienny viadučy radyjoversii hit-paradu «Tuzin Hitoŭ», jakaja idzie na chvalach «Radyjo Racyja». «Hety kancert musić stać samym śvietłym kancertam hodu», — miarkuje Aleh. Kancert «Tuzin. Unplugged» padtrymlivaje hramadzkaja kampanija «Budźma biełarusami». On-łajn tranślacyja «Tuzin. Unplugged» projdzie na partale TUT.BY.

Kancert pačniecca ŭ 19:00 25 krasavika ŭ mienskim klubie «Hrafici» (zav. Kalinina, 16).

Košt kvitka — 20 000 rub. Nabyć jaho možna ŭ klubie zahadzia z 18:00 da 22:00 štodnia, akrom suboty i niadzieli. Kolkaść miescaŭ abmiežavanaja! Teł. dla daviedak: (029) 17-999-18, (029) 77-999-18, (029) 613-95-06, (029) 270-11-15.

• 0
• 0
• 0
• 0
• 0
• 0
• 0
• 0