Калі Бабарыку не зарэгіструюць, могуць зняцца ўсе, апроч Канапацкай
У штабах прэтэндэнтаў у прэзідэнты разглядаюцца самыя розныя версіі далейшай стратэгіі ўдзелу ў выбарах.
Напэўна, зусім мізэрныя шанцы прайсці рэгістрацыю ў былога кіраўніка ПВТ Валерыя Цапкалы. ЦВК прызнаў сапраўднымі толькі 75 тысяч подпісаў, здадзеных у ягоную падтрымку. Вядома, Цапкала будзе абскарджваць гэтае рашэнне, але ўсе разумеюць, што малаверагодна, каб яго адмянілі.
Усё болей сігналаў прыходзіць адносна таго, што могуць не зарэгістраваць і былога банкіра Віктара Бабарыку, які на гэты момант знаходзіцца ў СІЗА і праходзіць у якасці абвінавачанага па некалькіх крымінальных справах. Бабарыка паспяхова пераадолеў этап збору подпісаў, але працягваецца праверка яго дэкларацыі аб даходах і маёмасці. Чым яна скончыцца — пакуль незразумела.
У такіх умовах, калі двое галоўных канкурэнтаў Лукашэнкі могуць быць не зарэгістраваныя, узнікае пытанне аб удзеле ў выбарах іншых патэнцыйных кандыдатаў.
Па інфармацыі «Нашай Нівы», Святлана Ціханоўская і яе штаб абсалютна не супраць таго, каб зняцца з выбараў. Фактычна пра неўдзел у выбарах гаварыў і сам Сяргей Ціханоўскі.
Які далейшы план дзеянняў у Андрэя Дзмітрыева, Сяргея Чэрачня і Ганны Канапацкай? Усіх гэтых кандыдатаў прынята лічыць спойлерамі — тымі, хто будзе ствараць масоўку на дадзеных выбарах, ніяк не прэтэндуючы на перамогу.
Тым не менш, па нашай інфармацыі, размовы пра зняццё вядуцца і з Сяргеем Чэрачнем, і з Андрэем Дзмітрыевым. Абодва кандыдаты не выключаюць такой магчымасці. Лідар «Грамады» Чэрачань марыць стаць кандыдатам, таму імкнецца не рабіць рэзкіх заяваў. Але застаецца верагоднасць таго, што ён не будзе ўдзельнічаць у дні галасавання.
Тое самае можна сказаць і пра Андрэя Дзмітрыева, які лічыць, што ў выпадку нерэгістрацыі Бабарыкі і Цапкалы зможа быць адзіным дэмакратычным кандыдатам. Але наколькі вядома «Нашай Ніве», і ён не выключае зняцця.
Затое экс-дэпутатка Палаты прадстаўнікоў Ганна Канапацкая не збіраецца сыходзіць з прэзідэнцкай кампаніі. Яна не ідзе ні ў які кантакт з прадстаўнікамі іншых штабоў.
Тым не менш крыніцы «Нашай Нівы» паведамляюць, што Канапацкая з вялікай насцярогай паставілася да прапановы ўключыць яе, Дзмітрыева і Чэрачня ў спіс неўязных у ЕС, калі яны ўсё ж будуць удзельнічаць у выбарах.
Чытайце таксама:
На Чэрачня ціснуць, каб ён прызнаў 143 тысячы подпісаў, якія яму «налічыла» ЦВК
Палітолаг Усаў: Калі Чэрачань, Канапацкая, Дзмітрыеў не знімуцца з выбараў, хай Еўрасаюз накладзе на іх санкцыі
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком23
Каментары