Што зменіцца для беларусаў пасля падпісання новага міграцыйнага пагаднення з Расіяй
Новае міграцыйнае пагадненне паміж Беларуссю і Расіяй прадугледжвае магчымасць уезду ў Расію па ID-картках, бестэрміновае знаходжанне грамадзян дзвюх краін на тэрыторыі суседняй дзяржавы і спрашчэнне афармлення дакументаў, піша выданне Office Life.
У ліпені Аляксандр Лукашэнка падпісаў указ аб ухваленні праекта зменаў у пагадненне аб роўных правах грамадзян у сферы міграцыі, а ў канцы верасня бакі падпісалі выніковы пратакол.
Адным з галоўных новаўвядзенняў стане магчымасць ездзіць у Расію па ID-картках любым відам транспарту. Цяпер гэты дакумент выкарыстоўваецца толькі ўнутры краіны. Для беларусаў гэта дазволіць ашчадзіць на афармленні біяметрычнага пашпарта, калі яны падарожнічаюць толькі ў Расію. Акрамя таго, можна будзе аддаць пашпарт у пасольства для афармлення візы і адначасова ездзіць у суседнюю краіну па ID-картцы.
Пратакол таксама замацоўвае права грамадзян Беларусі бестэрмінова знаходзіцца ў Расіі, а грамадзян Расіі — у Беларусі. Аднак пры знаходжанні ў суседняй краіне больш за 90 дзён рэгістрацыя па-ранейшаму будзе абавязковай.
Парадак афармлення дакументаў таксама спросцяць. Тэрмін разгляду заяў на пастаяннае жыхарства скароцяць з трох да двух месяцаў, а дазвол на часовае жыхарства будуць выдаваць на падставе самога факта наяўнасці грамадзянства адпаведнай краіны.
Зменяцца і правілы ўезду ў Беларусь для дзяцей да 14‑ці гадоў з расійскім грамадзянствам. Замест пасведчання аб нараджэнні ім спатрэбіцца замежны пашпарт.
Новыя правілы пачнуць дзейнічаць не адразу: пратакол яшчэ павінны ратыфікаваць заканадаўчыя структуры абедзвюх краін.
Цяпер чытаюць
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам1
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў55
Каментары